पुणे : "पाणी आडवा, पाणी जिरवा` हा विकासाचा मार्ग होता. पण तो विचार मागे पडून एकमेकाला अडवा आणि एकमेकांची जिरवा असं राजकारण गावोगावी सुरू झाल्यामुळे जलसंधारण झाले नाही," असे स्पष्टीकरण मुख्यमंत्री देवेंद्र फडणवीस यांनी आज पुण्यात दिले..
पाणी फाऊंडेशनच्या वॉटर कप बक्षीस वितरणाचा कार्यक्रम आज पुण्यात झाला. या कार्यक्रमात राज ठाकरे यांनी "गेल्या साठ वर्षात सिंचनाचा पैसा गेला कोठे, असा सवाल केला. त्याला उत्तर देताना मुख्यमंत्री फडणवीस यांनी राजकीय अडवाअडवीमुळे जलसंधारण झाले नाही,' असे सांगितलं.
याच कार्यक्रमासाठी उपस्थित असलेल्या माजी उपमुख्यमंत्री अजित पवार यांनी राज ठाकरे यांना जोरदारपणे उत्तर देताना 'काही लोक बोलघेवडे असतात. त्यांना काहीच काम करायचं नसतं. फक्त सभा गाजवायच्या असतात,`` असा टोमणा मारला. यानिमित्ताने या कार्यक्रमात राजकीय जुगलबंदी रंगल्याचे चित्र होते.
फडणवीस यांनी अमीर खान यांचे कौतुक करत "ते दरवर्षी दोन चित्रपट करायचे. पण त्यांनी चित्रपटाकडचे लक्ष कमी करून आपली सगळी ताकद गाव पाणीदार करण्यासाठी लावली आहे. त्यांनी सामान्य माणसांचा आत्मसन्मान जागवला. आपल्या गावाचा विकास आपणच करू शकतो, असा विश्वास त्यांनी लोकांना दिला. मीच माझ्या गावाचा विकास करू शकतो, हा विचार पाणी फाऊंडेशनने दिला आहे. "
अजित पवार यांनी पाण्याची पातळी वाढली म्हणून अतिउपसा नको असे सांगितले त्यावर फडणवीस यांनी पवार यांच्या मताला दुजोरा देत नवी पीकपद्धतच दुष्काळापासून वाचवू शकते.' असे सांगितले. या कार्यक्रमात अजित पवार आणि राज ठाकरे यांची जुगलबंदी मात्र चर्चेच्या केंद्रस्थानी राहिली.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.