मुंबई : खासदार प्रीतम मुंडे (Preetam Munde) यांना मंत्रिपद न मिळाल्यावरुन भाजपमध्ये गदारोळ सुरू आहे. यामुळे भाजपच्या (BJP) नेत्या पंकजा मुंडे (Pankja Munde) यांचा समर्थकांचे राजीनामासत्र सुरू आहे. या पार्श्वभूमीवर दिल्लीहून परतल्यानंतर पंकजा मुंडेंनी आज पहिल्यांदाच समर्थकांशी संवाद साधला. सर्व समर्थकांचे राजीनामे नामंजूर करीत असल्याचे त्यांनी जाहीर केले आहे.
पंकजा मुंडे यांनी दिल्लीहून परतल्यानंतर आज कार्यकर्त्यांशी मुंबईत संवाद साधला. त्या म्हणाल्या की, मी लालची नाही, मला सत्तेची कोणतीही लालसा नाही. मी असुरक्षित नाही. कुणालाही संपवून मला राजकारण करायचे नाही. त्यामुळे मी तुमच्या सर्वांचे राजीनामे नामंजूर करत आहे. मला दबाव तंत्र करायचे असेल तर ही ती जागा नाही. ही जागा पुरणार नाही आणि त्यासाठी वेगळी जागा लागेल.
मी काल दिल्लीत गेले होते. पक्षाचे राष्ट्रीय अध्यक्ष जे.पी. नड्डा यांच्याशी चर्चा झाली आहे. तुम्ही कार्यकर्त्यांना समजवाल हे त्यांनी मला सांगितले आहे. पंतप्रधान नरेंद्र मोदी यांनी मला झापल्याच्या बातम्या आल्या. मी फटकार खाऊन तुमच्यापुढे आली असते असं वाटतं का? गोपीनाथ मुंडे यांच्या निधनानंतर मला केंद्रात मंत्रिपद देण्याचा प्रस्ताव देण्यात आला होता. तेव्हा मी मंत्रिपद नाकारले होतं. आता ते पद मी मागेन का?
भगिनी प्रीतम मुंडे यांना केंद्रीय मंत्रिमंडळात न घेतल्याने नाराज असल्याचे सांगितले जाणाऱ्या पंकजा मुंडे यांनी दिल्लीत पंतप्रधान नरेंद्र मोदी यांची भेट घेतली. माजी मंत्री विनोद तावडे आणि महिला आघाडीच्या माजी राष्ट्रीय अध्यक्ष विजया रहाटकर यांच्यासह इतरही राष्ट्रीय सचिव त्यांच्यासोबत होते. पंतप्रधानांनी पंकजा मुंडे यांना स्वतंत्ररीत्या भेट दिली नसून राष्ट्रीय सचिवांच्या बैठकीत सहभागी झालेल्या सर्वांनाच पंतप्रधान यांनी आपल्या निवासस्थानी आमंत्रित केले होते, असे पक्ष सूत्रांनी सांगितले.
पक्षाध्यक्ष जे. पी. नड्डा यांच्या नेतृत्वाखाली भाजप संघटनेची नवीन टिम तयार झाली आहे. यातील सरचिटणीस आणि उपाध्यक्ष पदावरील नेत्यांशी पंतप्रधानांची चर्चा झाली होती. राष्ट्रीय सचिवांशी चर्चा राहिली होती. कोरोना आणि मंत्रीमंडळ विस्तारामुळे या बैठका लांबल्या होत्या. या बैठकांचे नियोजन आधीच झालेले होते. त्यानुसार तेरा राष्ट्रीय सचिवांना आज पंतप्रधानांच्या निवासस्थानी आमंत्रित करण्यात आले होते.
केंद्रीय मंत्रिमंडळाचा नुकताच विस्तार झाला. त्यात महाराष्ट्रातून डॉ. भागवत कराड आणि डॉ. भारती पवार या नवोदितांना मोदी यांनी संधी दिली. संभाव्य नावांमध्ये पंकजा यांच्या भगिनी आणि खासदार प्रीतम मुंडे यांचेही नाव होते. त्यांचा समावेश मंत्रिमंडळात न झाल्याने मुंडे भगिनी नाराज आहेत असे सांगितले जाते. पंकजा मुंडे यांनी मुंबईत पत्रकार परिषदेत ‘आम्ही नाराज नाही, कार्यकर्ते नाराज आहेत’ असे सांगितले होते. त्यानंतर बीडमधील भाजपच्या पदाधिकाऱ्यांनी राजीनामे दिले.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.