मुंबई : ओबीसी आरक्षणाच्या (OBC Reservation) मुद्यावरून विधानसभेत झालेल्या गोंधळाचे पर्यावसान आज राजकीय युद्धात झाले. आईबहिणीवरून शिवीगाळ झाल्याची तक्रार तालिका अध्यक्ष भास्कर जाधव यांनी केली. यानंतर संसदीय कामकाजमंत्री अनिल परब यांनी भाजपच्या बारा सदस्यांना एक वर्षासाठी निलंबित करण्याचा प्रस्ताव मांडला आणि तो बहुमताने मंजूर झाला. यावर भाजप नेते निलेश राणे यांनी भास्कर जाधव यांच्यावर हल्लाबोल केला आहे.
काही दिवसांपूर्वी भास्कर जाधव यांना त्यांच्याच गावात मंदिरातील कार्यक्रमात बोलावण्यात न आल्यामुळे वाद झाला होता. त्यावेळी गावकऱ्यांना जाधवांनी शिवीगाळ केली, असा आरोपही करण्यात आला होता. हाच धागा पकडून निलेश राणे यांनी जाधवांना लक्ष्य केले आहे. त्यांनी ट्विटरवर म्हटले आहे की, या भास्कर जाधवांना खोटं बोलायची सवय आहे. त्यांच्या गावात मंदिराच्या कार्यक्रमांमध्ये त्यांना बोलावलं नाही म्हणून स्वतःच्या गावात गावकऱ्यांना आईबहिणीवरुन शिव्या दिल्या होत्या व तसेच, अंगावर धावूनही गेले होते. भास्कर जाधव हे टपोरीरखा कोणाचीही कळ काढत बसतात म्हणून शिव्या दिल्या असतील, सवय आहे त्यांना.
गिरीश महाजन, अभिमन्यू पवार, आशिष शेलार, अतुल भातखळकर, संजय कुटे, राम सातपुते, जयकुमार रावळ, नारायण कुचे, किर्तीकुमार बांगडिया, पराग आळवणी, हरिष पिंपळे, योगेश सागर यांना एक वर्षासाठी निलंबित कऱण्यात आले. तसेच त्यांना मुंबई आणि नागपूरच्या विधानभवनाच्या आवारात येण्यास मनाई घातली.
ओबीसी आरक्षणाच्या मुद्यावरून भाजप आणि सत्ताधाऱ्यांत जोरदार चकमक झाली. काही सदस्यांनी डायसवरून माईक हिसकविण्याचा प्रयत्न केला. त्यानंतर सभागृह तहकूब झाले. उपाध्यक्ष नरहरी झिरवळ यांच्या केबिनमध्ये बैठक झाली. तेथे जाधव यांना शिवीगाळ झाली.
या साऱ्या मुद्यांबाबत भास्कर जाधव यांनी सभागृहात निवेदन केले. ते म्हणाले की मराठा आरक्षण, वैधानिक विकास मंडळ असे सर्व महत्वाचे ठराव चर्चा न करता मंजूर करतो. अधिकचे काही मुद्दे टाकायचे असतील तर दोन्ही बाजूंचे मुद्दे ऐकून तो ठराव सभागृह मंजूर करते. ओबीसींच्या आरक्षणाबाबतचा ठरावबाबत असे झाले नाही. भुजबळ यांनी ठराव मांडण्यापूर्वीच विरोधी नेते फडणवीस यांनी त्यास हरकत घेतली. मी त्यांना अडविले नाही. त्यांना बोलू दिले. त्या वेळी काही विरोधी सदस्य वेलमध्ये आले. त्या सदस्यांना मी मागे जायला सांगितले. मात्र फडणवीस यांनी त्यांना मागे जायचे नाही, असे सांगिल्याचे मी स्वतः ऐकले.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.