नवी दिल्ली : पुण्यातील सिरम इन्स्टिट्यूट ऑफ इंडिया (SII) कोरोनावरील कोव्होव्हॅक्स लशीचे (Covovax) उत्पादन करीत आहे. या लशीने परिणामकारकतेत कोव्हिशिल्ड (Covishield) आणि कोव्हॅक्सिनला (Covaxin) मागे टाकले आहे. ही लस सप्टेंबरमध्ये उपलब्ध होईल, अशी घोषणा सिरमचे मुख्य कार्यकारी अधिकारी अदर पूनावालांनी (Adar Poonawalla) केली आहे.
कोव्होव्हॅक्स लशीच्या चाचण्या अंतिम टप्प्यात आल्या आहेत. सिरमकडून ही लस सप्टेंबर महिन्यात उपलब्ध होईल, अशी आशा आहे, असे अदर पूनावाला यांनी म्हटले आहे. मागील वर्षी सप्टेंबर महिन्यात सिरमसोबत नोव्होव्हॅक्स कंपनीने कोव्होव्हॅक्स लशीच्या उत्पादनासाठी करार केला होता. या लशीच्या भारतातील चाचण्या नोव्हेंबर अखेरपर्यंत पूर्ण होतील. भारतात लशीच्या चाचण्या पूर्ण झालेल्या नसल्या तरी जागतिक पातळीवर झालेल्या चाचण्यांच्या आधारे या लशीच्या मंजुरीसाठी अर्ज करता येतो, असे पूनावाला यांनी स्पष्ट केले.
कोव्होव्हॅक्स 90 टक्के प्रभावी
कोव्होव्हॅक्स लस नोव्होव्हॅक्स या अमेरिकेतील कंपनीसोबत सिरम तयार करीत आहे. अमरिकेतील या लशीच्या चाचण्यांचे निष्कर्ष जाहीर करण्यात आले आहेत. याविषयी नोव्होव्हॅक्स कंपनीने म्हटले आहे की, मध्यम ती तीव्र स्वरुपाच्या कोरोना संसर्गापासून ही लस 100 टक्के संरक्षण देते. याचवेळी एकूण 90.4 टक्के संरक्षण ही लस देते. अमेरिका आणि मेक्सिकोतील 119 शहरांमध्ये या चाचण्या करण्यात आल्या. यात 29 हजार 960 जणांचा सहभाग होता. यावर्षातील तिसऱ्या आठवड्यात या लशीच्या मंजुरीसाठी अर्ज करण्यात येईल.
या लशीच्या परिणामकारकता तिसऱ्या टप्प्यातील चाचण्यांत 90.4 टक्के आहे. अमेरिकेतील फायजर आणि मॉडर्ना यांच्या कोरोना लशींची तिसऱ्या टप्प्यातील चाचण्यांतील परिणामकारकता अनुक्रमे 91.3 टक्के आणि 90 टक्के आहे. याचवेळी कोव्हिशिल्डची परिणामकारकता 76 टक्के (अमेरिकेतील चाचण्या) आणि कोव्हॅक्सिनची परिणामकारकता 81 टक्के आहे.
सध्या देशात प्रामुख्याने कोव्हिशिल्ड आणि कोव्हॅक्सिन या दोन लशींचा वापर होत आहे. परिणाकारतेचा विचार केल्यास ही लस कोव्हिशिल्ड आणि कोव्हॅक्सिनरपेक्षा अधिक प्रभावी आहे. देशात स्पुटनिक व्ही या लशीचा काही प्रमाणात वापर सुरू आहे. स्पुटनिक व्ही लशीची परिणामकारकता 91.6 असून, जवळपास कोव्होव्हॅक्स लशीएवढीच आहे. कोव्होव्हॅक्स ही लस मध्यम ते तीव्र कोरोना संसर्गापासून संरक्षण मिळवून देत आहेत.
कंपनी लशीचे दरमहा 10 कोटी डोस उत्पादित करणार आहे. तिसऱ्या तिमाहीअखेर हा आकडा दरमहा 15 कोटींवर जाईल. जागतिक आरोग्यव्यवस्थेवर आलेल्या कोरोना संकटाच्या काळात ही लस महत्वाची भूमिका बजावणार आहे. जगातील स्थिती पाहता सध्याच्या काळात लशीची अतिशय आवश्यकता आहे, असेही नोव्होव्हॅक्स कंपनीने म्हटले आहे.
सध्या देशात तीन कोरोना लशींचा वापर होत आहे. सिरम इन्स्टिट्यूट ही कोव्हिशिल्ड या कोरोना लशीचे उत्पादन करीत आहे. ही लस ऑक्सफोर्ड युनिव्हर्सिटी आणि अॅस्ट्राझेन्का यांनी विकसित केली आहे. दुसरी लस ही भारत बायोटेकची कोव्हॅक्सिन ही आहे. याचबरोबर रशियाची स्पुटनिक व्ही लसही देशात उपलब्ध आहे.
Edited by Sanjay Jadhav
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.