सोलापूर ः सोलापूर जिल्ह्यातील करमाळ्याचे अपक्ष आमदार संजय शिंदे यांच्या विठ्ठल कॉर्पोरेशन, म्हैसगाव (ता. माढा) या साखर कारखान्याने तब्बल 22 कोटी 11 लाख रुपयांचे कर्ज शेतकऱ्यांच्या नावे परस्पर काढल्याचे उघड झाले आहे. संबंधित शेतकऱ्यांनी सोलापूरचे जिल्हाधिकारी मिलिंद शंभरकर, जिल्हा पोलिस अधीक्षक तेजस्वी सातपुते यांच्याकडे तक्रार केली आहे. आम्हाला न्याय द्यावा; अन्यथा आम्हाला आत्महत्या केल्याशिवाय पर्याय राहणार नाही, अशी आर्त हाकही त्यांनी निवेदनात दिली आहे. (Serious complaint against MLA Sanjay Shinde to Collector and SP)
आमदार संजय शिंदे हे विठ्ठल कॉर्पोरेशन या साखर कारखान्याचे संस्थापक आहेत. त्यांनी आपल्याच मतदारसंघातील शेतकऱ्यांना 2013 मध्ये खत देतो; म्हणून त्यांच्याकडून कागदपत्रे जमा केली आहेत. मात्र, शेतकऱ्यांना खत न देता त्या कागदपत्रांचा गैरवापर करत पुण्यातील कोथरूड येथील पंजाब नॅशनल बँकेकडून शेतकऱ्यांच्या नावे तब्बल 22 कोटी 11 लाख रुपयांची रक्कम उचलल्याचे समोर आले आहेत. या शेतकऱ्यांनी सोलापूरच्या जिल्हाधिकाऱ्यांना निवेदन देत या कारखान्याचे अध्यक्ष व कारखान्यावर कारवाई करावी. आम्हाला न्याय द्यावा; अन्यथा आम्हाला आत्महत्या केल्याशिवाय पर्याय राहणार नाही, अशी व्यथा शेतकरी रणजीत भोगल अशोक भोगल, प्रदीप ढवळे या शेतकऱ्यांनी केली आहे. विशेष म्हणजे कर्ज असलेल्या तक्रारदार शेतकऱ्यांपैकी अशोक भोगल हे पोलिस असून त्यांच्याही नावावर विठ्ठल कार्पोरेशन कारखान्याने कर्ज उचलेले आहे.
याबाबत माहिती अशी की, करमाळा तालुक्यातील शेतकरी रणजीत भोगल, अशोक भोगल व प्रदीप ढवळे यांच्यासह शेकडो शेतकऱ्यांना मे महिन्यात पुणे येथील पंजाब नॅशनल बँकेच्या कोथरूड शाखेच्या कर्ज घेतलेल्या नोटिसा आल्या आहेत. या नोटिशा हातात पडताच शेतकरी हबकून गेले आहेत.
दरम्यान, या शेतकऱ्यांना विठ्ठल कार्पोरेशन म्हैसगाव यांनी 2013 मध्ये खत घेण्यासाठी म्हणून शेतकऱ्याच्या नावाने दोन लाख रुपयांच्या आसपास रक्कम उचलल्याचे नोटिशीमध्ये म्हटले आहे. या शेतकऱ्यांनी कोणत्याच प्रकारे बॅंकेकडून कर्ज घेतले नसताना आलेली नोटीस पाहून शेतकरी चक्रावून गेले आहेत. याबाबत अधिक माहिती व चौकशी केली असता आमदार संजय शिंदे यांच्या विठ्ठल कॉर्पोरेशन, म्हैसगाव येथील कारखाने 2013 मध्ये हे कर्ज उचलले असून शेतकऱ्यांच्या परस्पर या या कर्जाचे 2017 मध्ये नवे-जुने केले आहे. दरम्यान, यानंतर डायरेक्ट शेतकऱ्यांना 29 मे 2019 रोजी नोटीस आली आहे. शेतकऱ्यांच्या नावे उचलेली एकूण रक्कम 22 कोटी 11 लाख रुपये असून शेतकऱ्यांनी आपापल्या नावे असलेले कर्जे भरावे; अन्यथा फौजदारी कारवाईचा इशारा बॅंकेने दिला आहे.
करमाळ्याचे लोकप्रतिनिधी असलेले संजय शिंदे यांनी नुसत्या विकासाच्या गप्पा मारण्यापेक्षा शेतकऱ्यांच्या नावे कर्ज काढून जी फसवणूक केली आहे, त्याचे उत्तर द्यावे. त्यांनी त्वरीत आमच्या नावावर उचलेले कर्ज भरुन आम्हाला कायदेशीर कचाट्यातून वाचवावे, अन्यथा आमदार संजय शिंदे यांच्या घरापुढे आत्महत्या करण्याशिवाय आम्हाला पर्याय राहणार नाही, असा इशारा या तक्रारदार शेतकऱ्यांनी सोलापूर येथील पत्रकार परिषदेत दिला आहे. या वेळी उजनी धरण पाणी बचाव समितीचे अध्यक्ष अतुल खुपसे हेही उपस्थित होते.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.