कोणाच्या रक्तात दरोडे आहेत, हे योग्य वेळी सांगेन : राहुल कुल

केडगाव (जि. पुणे) : ‘दौंड तालुक्यात दरोडे घालायचे काम कुणी केले, हे जुन्या पिढीला माहित आहे. नवीन पिढीला हा इतिहास सांगायला लावू नका. या इतिहासावर विश्वास बसणार नाही इतके ते कटू सत्य आहे. त्यामुळे त्यावर भाष्य न केलेले बरे. परंतू योग्य वेळ आल्यानंतर कोणाच्या रक्तात चोऱ्यामाऱ्या व दरोडे आहेत, हे मी तालुक्याला दाखवून देईन,’ अशा शब्दांत भाजपचे आमदार राहुल कुल यांनी पुणे जिल्हा बँकेचे अध्यक्ष व माजी आमदार रमेश थोरात यांच्या आरोपाला उत्तर दिले. (MLA Rahul Kul's reply to former MLA Ramesh Thorat's allegation)

आमदार राहुल कुल हे चोऱ्या, दरोडे घालूनही साजूक असल्यासारखे वागत आहे, अशी टीका रमेश थोरात यांनी कुल यांच्यावर केली होती. या टीकेला उत्तर देताना आमदार कुल बोलत होते.
 
हेही वाचा : चोऱ्यामाऱ्या, दरोडे घालूनही आमदार राहुल कुल साजूक असल्यासारखे वागतात 

कुल म्हणाले, माझे आजोबा बाबूराव कुल हे दौंड पंचायत समितीचे पहिले सभापती होते. वडील सुभाष कुल हे आमदार होते. रमेश थोरात यांनी त्यांचे पुर्वज काय करत होते, हे एकदा जाहीर करावे. माझ्या पुर्वजांच्या सामाजिक योगदानाचे व त्यांच्या पुर्वजांच्या कारनामांचे थोरात यांना विस्मरण झालेले दिसते; परंतू हे वयोमानानुसार होत राहते. त्यांना आठवत नसेल तर त्यांनी आजूबाजूच्या लोकांना विचारावे. त्यांना त्यांचा इतिहास आठवत असता तर ते असे बोलले नसते. चोऱ्यामाऱ्या करणे हे कुणाच्या रक्तात आहे, हे मी सांगण्याची गरज नाही. दरोडे घालण्याची परंपरा कोणाची आहे, हे आठवण्यासाठी थोरात यांनी मागे वळून पाहण्याची गरज आहे.

हेही वाचा : काँग्रेस येथे माझ्यावर बलात्कार करण्याचा प्रयत्न करतेय : गृहमंत्री बरळले

रमेश थोरात यांनी साखर आयुक्तांकडे चौकशीची मागणी करताना ते कारखान्याचे संचालक झाले, तेव्हापासून चौकशीची मागणी करावी. म्हणजे सत्य बाहेर येईल. ते कारखान्याचे उपाध्यक्ष असताना त्यांनाही सह्यांचे अधिकार होते. त्यांनी काय काय कारनामे केले, हे संपूर्ण दौंड तालुक्याला माहित आहे. ते कारखान्यात सर्वेसर्वा असताना त्यांनी विनातारण विनाकारण ५५ कोटी रूपयांचे कर्ज घेतले. अशा अनेक कर्जांचा बोजा कारखान्यावर आहे. काय चौकश्या लावयाच्या आहेत, त्या त्यांनी लावून घ्याव्यात. फक्त त्यांच्या कार्यकालापासून चौकशी झाली पाहिजे एवढीच आमची मागणी आहे, असेही राहुल कुल म्हणाले.