नवी दिल्ली : जगातील लस उत्पादकांमध्ये अग्रस्थानी असलेल्या पुण्यातील सिरम इन्स्टिट्युट ऑफ इंडियाने (SII) आणखी एक महत्वाचं पाऊल टाकलं आहे. रशियाच्या स्पुटनिक व्ही (Sputnik V) या कोरोना (Covid-19) प्रतिबंधात्मक लशीचे उत्पादन घेण्याची तयारी कंपनीने सुरू केली आहे. त्यासाठी भारतीय औषध महानियंत्रकांकडे परवानगी मागितली आहे. ही मान्यता मिळाल्यास स्पुटनिक व्ही लशीचे भारतात उत्पादन सुरू होऊन लशींच्या तुटवडा कमी होऊ शकतो. (Serum Institute of India applies to seeking permission for manufacture Sputnik V)
सिरम इन्स्टिट्युटकडून सध्या कोविशिल्ड या लशीचे उत्पादन घेतले जात आहे. ही लस ऑक्सफर्ड विद्यापीठ व अॅस्ट्राझेनेका कंपनीने विकसित केली आहे. सिरमकडून नोव्हाव्हॅक्स कंपनीच्या कोव्होव्हॅक्स या लशीचे उत्पादन करण्यात येत आहे. पण अद्याप या लशीच्या वापरासाठी परवानगी मिळालेली नाही. स्पुटनिकला परवानगी मिळाल्यास सिरमकडील ही तिसरी लस ठरणार आहे. कंपनीचे मुख्य कार्यकारी अधिकारी अदर पूनावाला यांच्याकडून लस उत्पादन वाढवण्यासाठी सातत्याने प्रयत्न केले जात आहेत.
भारतात सध्या स्पुटनिक व्ही लस आयात करावी लागत आहे. नुकतेच या लशीचे सुमारे 30 लाख डोस भारतात आले आहे. डॅा. रेड्डीज या कंपनीकडून ही आयात करून वितरित केली जात आहे. लस आयात करावी लागत असल्याने त्याची किंमतही जवळपास एक हजार रुपये आहे. त्यामुळे सर्वसामान्य नागिरकांच्या आवाक्याबाहेर आहे. तसेच मर्यादित स्वरूपातच लस येत असल्याने देशातील लशींच्या तुटवड्यावर त्याचा फारसा परिणाम होत नाही.
सिरमने बुधवारी DCGI कडे लस उत्पादनाला परवानगी देण्याचा अर्ज केला आहे. त्यामध्ये चाचण्यांचे विश्लेषण व त्याच्या परिक्षणांनाही परवानगी घ्यावी लागेल. त्यानंतर आप्तकालीन वापरासाठी मान्यता घ्यावी लागेल. सिरमकडून जून महिन्यापासून दर महिन्याला कोविशिल्ड लशीच्या 10 कोटी डोसचे उत्पादन केले जाणार आहे.
वर्षभरात भारताला स्पुटनिक व्ही लशीचे सुमारे 85 कोटी डोस मिळतील, अशी अपेक्षा आहे. डॅा. रेड्डीज कंपनीकडून ऑगस्ट आणि डिसेंबर महिन्यात या लशीचे सुमारे 15 कोटींहून अधिक लस भारतातच बनविली जाणार आहे. सिरमला ही मान्यता मिळाल्यास भारताला स्पुटनिक लशीचे मोठ्या प्रमाणावर डोस उपलब्ध होऊ शकतात.
Edited By Rajanand More
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.