Pimpri News : राष्ट्रवादीचे आमदार बनसोडेंच्या मनात नेमकं चाललंय तरी काय? 'त्या' फोटोमुळे पुन्हा चर्चेत

उत्तम कुटे

Pimpri Political News : पिंपरीचे राष्ट्रवादी कॉंग्रेसचे आमदार अण्णा बनसोडे हे पक्षाचे कार्यक्रम,बैठकांना अनेकदा दांडी मारत असल्याने ते पक्षात नाराज असल्याची व त्यातून ते भाजपमध्ये जाणार असल्याची चर्चा यापूर्वी झाली होती. तिचे त्यांनी त्यावेळी खंडनही केले होते. नंतर,थेट मुख्यमंत्री एकनाथ शिंदे यांच्या मोटारीतूनत त्यांनी गेल्या महिन्यात तीस तारखेच्या रात्री मंत्रालय,मुंबई ते मुख्यमंत्र्यांचे खासगी निवासस्थान,ठाणे असा प्रवास केल्याने ते पुन्हा चर्चेत आले होते.

मतदारसंघातील प्रश्नांच्या सोडवणुकीसाठी मुख्यमंत्र्य़ाबरोबर त्यांच्या मोटारीतून प्रवास केल्याचा खुलासा आमदार अण्णा बनसोडेंनी त्याचदिवशी ठाण्यातून `सरकारनामा`शी बोलताना केला होता.आता चिंचवड पोटनिवडणुकीचा प्रचार ऐनभरात आला असताना त्यांच्या नावाच्या चर्चेची हॅटट्रिकच झाली आहे. चर्चेला कारणही तसेच आहे.

ते आमदार असलेल्या राष्ट्रवादीचे कट्टर प्रतिस्पर्धी भाजपच्या चिंचवडमधील उमेदवार अश्विनी जगताप यांचे पती आणि ज्यांच्या निधनाने ही पोटनिवडणूक लागली ते चिंचवडचे भाजप आमदार लक्ष्मण जगताप यांच्याबरोबरचा फोटो त्यांनी आपल्या व्हाटस अप डीपीवर ठेवला आहे

या निवडणुकीचा प्रचार शेवटच्या टप्यात असतानाही हा डीपी अद्याप तसाच आहे. त्यामुळे त्याची चर्चा झाली नसती,तर नवलच.त्यातून ते पुन्हा भाजपमध्ये जाणार अशी आवई पुन्हा उठली. दरम्यान,डीपीवरील स्व.आ. जगतापांबरोबरच्या आपल्या फोटोसंदर्भात खुलासा करताना आमची ही राजकारणापलिकडील मैत्री असल्याचे आमदार अण्णा बनसोडे (Anna Bansode) यांनी 'सरकारनामा'ला सांगितले.

पहिल्यांदा नगरसेवक व आमदार होताना लक्ष्मणभाऊंनी मला मोठी मदत केली होती,असा कृतज्ञतापूर्वक उल्लेख त्यांनी केला. तसेच पक्षाशी प्रामाणिक असल्याचे त्यांनी पुन्हा स्पष्ट केले. आमचे उमेदवार नाना काटे हे निवडून येण्यासाठी आमचे नेते अजित पवार यांच्याबरोबर समाजबांधवांची पिंपरी कॅम्पात सिंधी बैठक घेतली याकडेही त्यांनी लक्ष वेधले.