काबूल : अफगाणिस्तानमध्ये (Afghanistan) तालिबानने (Taliban) सत्ता स्थापन केली आहे. तालिबान्यांनी काबूलमध्ये पाऊल ठेवताच अफगाणिस्तानचे अध्यक्ष अशरफ घनी (Ashraf Ghani) देश सोडून पळाले आहेत. सुरूवातीला ते ताजिकिस्तान, उझबेकिस्तान, ओमान यापैकी एका देशामध्ये गेल्याची चर्चा होती. पण मागील तीन दिवसांपासून त्यांचा निश्चित थांगपत्ता नव्हता. (UAE has welcomed President Ashraf Ghani and his family)
तालिबानने रविवारी राजधानी काबूलमध्ये पाऊल ठेवताच घनी यांनी पलायन केलं. अफगाणिस्तानमधून पळालेले घनी ताजिकिस्तानमध्ये आश्रयास गेले होते. पण तेथे त्यांच्या विमानास उतरण्यास नकार मिळाला. ताजिकीस्तानचे दरवाजे बंद झाल्याने घनी हे ओमानमध्ये तात्पुरते आश्रयास गेल्याची चर्चा होती. ते तेथून अमेरिकेत जाण्याच्या प्रयत्नात असल्याचेही बोलले जात होते.
मागील तीन दिवसांपासून त्यांचा नेमका ठावठिकाणा लागत नव्हता. बुधवारी संयुक्त अरब अमीरातने एक निवेदन प्रसिध्दीस देत घनी यांच्या ठावठिकाणाची माहिती दिली. घनी आणि त्यांच्या कुटूंबाला मानवतेच्या दृष्टीकोनातून देशात स्वागत केल्याचे या निवेदनात म्हटले आहे. त्यामुळे अखेर घनी हे नेमके कुठे पळून गेले, या चर्चेला पूर्णविराम मिळाला आहे. दरम्यान, देशाला संकटात वाऱ्यावर सोडून घनी पळाल्याने त्यांच्या विरोधात जनतेत संतप्त प्रतिक्रिया उमटत आहेत.
तालिबान्यांनी अध्यक्षीय भवनावर कब्जा मिळवत अफगाणिस्तानात आपली सत्ता स्थापन केली आहे. त्यामुळे लोकनियुक्त सरकार जाऊन आता अफगाणिस्तान तालिबान्यांच्या हातात गेलं आहे. तालिबानचा कमांडर मुल्ला अब्दुल गनी बरदार अफगाणिस्तानचा नवा प्रमुख असू शकतो. तालिबान्यांनी रविवारी (ता.15) सकाळी राजधानी काबूलमध्ये पाय ठेवले. तालिबान्यांनी काबूलमध्ये पाय ठेवताच अफगाण सरकार घाबरले होते. त्यांनी चर्चेतून सत्ता परिवर्तनासाठी आवाहन केले होते. त्यानुसार अध्यक्षीय भवनात याबाबत चर्चा होणार होती. मात्र त्यापूर्वीच अशरफ घनी यांनी देश सोडला.
अफगाणिस्तानमध्ये 20 वर्षांपासून असलेले अमेरिकेचे सैन्य तेथून परतल्यानंतर पुन्हा एकदा तालिबानने वर्चस्व प्रस्थापित केले आहे. अध्यक्ष बायडन यांनी अफगाणिस्तानमधून अमेरिकेचे संपूर्ण सैन्य माघारी बोलावण्यासाठी 31 ऑगस्ट ही अंतिम मुदत ठरवली होती. त्याआधी दोन आठवडे तालिबानने अफगाणिस्तानवर पुन्हा ताबा मिळवला आहे. या घडामोडींमुळे जगभरातील अनेक देशांनी गंभीर प्रतिक्रिया व्यक्त केली आहे.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.