ठाणे : शिवसेनेचे (Shivsena) आमदार प्रताप सरनाईक (Pratap Sarnaik) हे बेपत्ता असल्याची तक्रार आज सकाळी भाजपकडून (BJP) वर्तकनगर पोलीस ठाण्यात देण्यात आली होती. यानंतर शिवसेनेच्या ५५व्या वर्धापन दिनानिमित्त सरनाईक हे मतदारसंघात अवतरले. ओवळा-माजिवडा मतदारसंघासाठी आमदार निधीतून एक कोटी रूपयांच्या कार्डियाक रूग्णवाहिकांचे लोकार्पण आज सरनाईक यांच्या हस्ते झाले. मतदारसंघासाठी काही करीत नसल्याचा आरोप करणाऱ्या भाजप नेत्यांनाही त्यांनी यातून चपराक लगावली आहे.
आमदार प्रताप सरनाईक हे बेपत्ता असल्याची तक्रार आजच भाजपने केली होती. या वेळी 'आमदार झाले Mr.india' असे बॅनर घेऊन भाजपचे पदाधिकारी, कार्यकर्त्यांनी आंदोलनात सहभाग घेतला होता. सरनाईक हे मातोश्रीवर असल्याचा आरोप भाजपने केला होता. सरनाईक हे गेल्या १०० दिवसांपासून बेपत्ता असल्याचा आरोपही भाजपने केला होता. भाजप नेते किरीट सोमय्या, आमदार निरंजन डावखरे आणि ५० कार्यकर्त्यांनी मानवी साखळी करुन हे आंदोलन केले होते.
सकाळी भाजपचे आंदोलन झाल्यानंतर सरनाईक मतदारसंघात दाखल झाले. शिवसेनेच्या ५५व्या वर्धापन दिनानिमित्त ओवळा-माजिवडा मतदारसंघासाठी आमदार निधीतून एक कोटी रूपये खर्च करून सरनाईक यांच्या हस्ते कार्डियाक अॅम्बुलन्सचे लोकार्पण आज झाले. त्यांनी गेल्या तीन वर्षांपासून दरवर्षी ओवळा-माजिवडा मतदारसंघासाठी दोन-दोन कार्डियाक अँब्युलन्स आमदार निधीतून महापालिकेला दिल्या आहेत. यावर्षीही त्यांनी आमदार निधीतून कार्डियाक अँब्युलन्ससोबत मोक्षरथही दिला आहे. कोरोनाच्या तिसऱ्या लाटेचा विचार करता या कार्डियाक अँब्युलन्समध्ये लहान मुलांना लागणारे ऑक्सिजन सिलिंडर तसेच घरातून हॉस्पिटलमध्ये नेण्यासाठी लागणारी वैद्यकीय उपकरणे आहेत. याचबरोबर रूग्णांच्या सेवेसाठी नर्स व डॉक्टरांचीही मोफत सुविधा असणार आहे.
रूग्ण मृत्युमूखी पडल्यानंतर रूग्णांलयातून किंवा घरातून स्मशानभूमीपर्यंत नेण्यासाठी मृतांच्या नातेवाईकांना अनेक समस्यांना सामोरे जावे लागते. कधी अँब्युलन्समधून तर कधी-कधी खासगी वाहनातून मृतदेह न्यावा लागतो. त्यातही अँब्युलन्समधून किंवा खासगी वाहनातून कोरोनाने मृत झालेल्या रूग्णास स्मशानभूमीमध्ये नेल्यानंतर त्या गाडीचे योग्य प्रकारे सॅनिटायजेशन न केल्यामुळे इतर लोकांनाही कोरोनाचा प्रादुर्भाव होऊ शकतो. यासाठी मोक्षरथाची सुविधा देण्यात आली असून मोक्षरथासाठी मृतांच्या नातेवाईकांनी महानगरपालिकेला कळविल्यानंतर शववाहिकेची महानगरपालिकेतर्फे मोफत सेवा पुरविण्यात येणार आहे.
या प्रसंगी नगरसेविका परिषा सरनाईक, युवा सेना सचिव-नगरसेवक पुर्वेश सरनाईक, लोकमान्य नगर-सावरकर नगर प्रभाग समिती अध्यक्षा आशा संदीप डोंगरे, वैद्यकीय अधिकारी डॉ. दिनेश शेंदारकर, डॉ. वैशाली पालांडे, डॉ. अतुल जाधव, डॉ. निगम, विभागप्रमुख रामचंद्र गुरव, सामाजिक कार्यकर्ते संदिप डोंगरे, भगवान देवकाते, शिवसेना महिला आघाडी, युवा सेना व शिवसेनेचे पदाधिकारी तसेच स्थानिक रहिवाशी उपस्थित होते.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.