मुंबई : राज्य मंत्रीमंडळाचा विस्तार 21 नोव्हेंबर नंतरच होणार असल्याचे स्पष्ट झाले असून नागपूरचे हिवाळी अधिवेशन सहा मंत्र्यावरच चालवण्यात येणार आहे. त्यामुळे हिवाळी अधिवेशनात सहा मंत्र्यांनाच भाजपच्या १०५ आमदारांचा सामना करावा लागणार आहे .
पण जयंत पाटील, छगन भुजबळ, बाळासाहेब थोरात , सुभाष देसाई , एकनाथ शिंदे आणि नितीन राऊत हे अनुभवी मंत्री असून ते भाजपचे आव्हान परतवून लावतील असा विश्वास सत्तारूढ पक्षांकडून व्यक्त केला जात आहे.
शिवसेना, राष्ट्रवादी व कॉंग्रेसच्या महाविकास आघाडीत मंत्रीपदाचे वाटप निश्‍चित झालेले असले तरी खातेवाटपाची चर्चा सुरू आहे. त्यातच राष्ट्रवादी कॉंग्रेसमधे उपमुख्यमंत्री पदासाठी नेत्याचे नाव अंतिम झालेले नाही. त्यामुळे मंत्रीमंडळ विस्तार लांबणीवर पडणार हे स्पष्ट झाले आहे.
दरम्यान, कॉंग्रेसने पक्षश्रेष्ठीकडून मंत्रीपदे व मिळणारी खाती यावर सहमती मिळवली आहे. कॉंग्रेसकडून मंत्रीपदाची शपथ घेणाऱ्यांची यादी देखील तयार आहे. मात्र, राष्ट्रवादीत उपमुख्यमंत्री पदासाठी अजित पवार यांनाच आग्रह केला असून त्यांचे मन वळवण्याची तयारी सुरू आहे.
अजित पवार पक्षाच्या कामात सक्रिय झाले असले ती मंत्रीमंडळात सहभागी होण्याबाबत ते अद्‌याप तयार नसल्याचे सांगण्यात येते. मात्र, पक्षातील सर्व नेते व आमदार यांना अजित पवार मंत्रीमंडळात हवे असून त्यांच्या मनधरणीचे प्रयत्न सुरू आहेत.
नागपूर येथे 16 डिसेंबर पासून या महाविकास आघाडी सरकारचे पहिले हिवाळी अधिवेशन सुरू होत आहे. केवळ पाच दिवस हे अधिवेशन सुरू राहणार असून सहा मंत्र्यावरच कामकाज उरकण्याचा भार राहणार आहे.
विधानसभा व विधानपरिषद या दोन्ही सभागृहात या सहा मंत्र्यानाच विरोधकांचा सामना करावा लागेल. मुख्यमंत्री उध्दव ठाकरे यांचे हे पहिलेच अधिवेशन असल्याने त्यांच्या समोर विरोधी पक्षाचे आव्हान आहे.
या अगोदर तत्कालीन मुख्यमंत्री शरद पवार यांनी 1978 ला पुलोद आघाडीचे सरकार स्थापन केल्यानंतर केवळ चार मंत्र्यावरच हिवाळी अधिवेशन उरकले होते. त्यामुळे, दोन्ही सभागृहाचे कामकाज करण्यात या सहा मंत्र्यांना कोणतीही अडचण येणार नाही, असा दावा केला जात आहे.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.