नागपूर : एमआयएमचे अध्यक्ष खासदार असादुद्दीन ओवैसी व भारिप बहुजन महासंघाचे अध्यक्ष प्रकाश आंबेडकर यांची संयुक्त जाहीरसभा गुरुवारी (ता. 13) नागपुरात होणार आहे. या सभेत हे दोन्ही नेते काय बोलणार याकडे कॉंग्रेसच्या नेत्यांचे प्रामुख्याने लक्ष लागले आहे.
येत्या लोकसभा निवडणुकीसाठी कॉंग्रेस-राष्ट्रवादी कॉंग्रेसच्या महाआघाडीत प्रकाश आंबेडकर यांनी सहभागी व्हावे, यासाठी कॉंग्रेस नेत्यांचे प्रयत्न सुरू आहेत. या प्रयत्नांना प्रकाश आंबेडकरांकडून कोणताही सकारात्मक प्रतिसाद नाही. आंबेडकर यांनी एमआयएमशी आघाडी करून राज्यात निवडणुका लढण्याचा निर्णय घेतला आहे. प्रकाश आंबेडकर व ओवैसी यांची संयुक्त जाहीरसभा नागपुरातील कस्तुरचंद पार्कवर गुरुवारी होणार आहे. या सभेत हे दोन्ही काय भूमिका घेतात, याकडे सर्वांचे लक्ष लागले आहे. प्रामुख्याने कॉंग्रेसच्या नेत्यांचे कान या सभेकडे राहणार आहे.
नागपुरात मुस्लिम व दलित मतदारांची मोठी संख्या आहे. दोन्ही समाज लोकसभा निवडणुकीवर मोठा प्रभाव टाकतात. दोन्ही समाज या नेत्यांच्या मागे गेल्यास कॉंग्रेसच्या अडचणीत वाढ होणार, हे स्पष्ट आहे. या दोन्ही नेत्यांची भूमिका नागपुरात स्पष्ट होईल, असे बोलले जात आहे. एमआयएमबद्दल कॉंग्रेसच्या भूमिकेतही बदल होत आहे. एमआयएमबद्दल मवाळ भूमिका घेण्याचे संकेत कॉंग्रेसच्या नेत्यांना वरिष्ठ पातळीवरून आल्याचे समजते. परंतु प्रकाश आंबेडकर यांची राष्ट्रवादी कॉंग्रेसबद्दल असलेल्या विरोधामुळे या दोन्ही नेत्यांच्या भाषणाला राजकीयदृष्ट्या महत्त्व प्राप्त झाले आहे.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.