सचिन वाझेंना न्यायालयाकडून दिलासा नाहीच; 3 एप्रिलपर्यंत एनआयए कोठडीत रवानगी - suspended police officer sachin vaze sent to nia custody till 3 april | Politics Marathi News - Sarkarnama

सचिन वाझेंना न्यायालयाकडून दिलासा नाहीच; 3 एप्रिलपर्यंत एनआयए कोठडीत रवानगी

वृत्तसंस्था
गुरुवार, 25 मार्च 2021

निलंबित सहाय्यक पोलीस निरीक्षक सचिन वाझे यांना आज न्यायालयात हजर करण्यात आले. त्यांना दिलासा देण्यास न्यायालयाने नकार दिला. 

मुंबई : उद्योगपती मुकेश अंबानी यांच्या अँटिलिया या निवासस्थानाबाहेर स्फोटके ठेवणे तसेच मनसुख हिरेन यांची हत्या या दोन्ही प्रकरणातील संशयित आरोपी निलंबित सहाय्यक पोलिस निरिक्षक सचिन वाझे यांच्या कोठडीची मुदत 15 दिवस वाढवावी, अशी मागणी राष्ट्रीय तपास संस्थेने (एनआयए) विशेष न्यायालयात केली. न्यायालयाने वाझेंची 3 एप्रिलपर्यंत एनआयए कोठडीत रवानगी केली आहे. 

वाझेंच्या एनआयए कोठडीची मुदत आज संपत आहे. त्यामुळे त्यांना आज विशेष न्यायालयात हजर करण्यात आले. त्यांच्या कोठडीची मुदत 15 दिवस वाढवावी, अशी मागणी एनआयएने न्यायालयाकडे केली. एनआयएच्यावतीने अतिरिक्त सॉलिसिटर जनरल अनिल सिंह यांनी युक्तिवाद केला. ते म्हणाले की, वाझेंचा गुन्हा हा देशपातळीवरील एक मोठा गुन्हा आहे. या गुन्ह्याचा सखोल तपास होणे हे महत्वाचे आहे. एखाद्या पोलीस अधिकाऱ्याचा अशा गुन्ह्यात सहभाग असणे ही शरमेची बाब आहे. 

हेही वाचा : वाझेंच्या घरात सापडल्या पिस्तुलाच्या 62 गोळ्या अन् त्यांचा सरकारी हिशेबच नाही

यावर वाझेंचे वकील म्हणाले की, वाझेंबाबत  एनआयएकडे ठोस पुरावे नाहीत. कारण त्या गाडीत फक्त जिलेटिनच्या कांड्या आढळून आल्या आहेत. डिटोनेटरशिवाय त्या कांड्या विस्फोटक मानल्या जाऊ शकत नाहीत. त्यामुळे बेकायदा कारवाया प्रतिबंधक कायदा (यूएपीए) अंतर्गत नोंदवलेली कलमे चुकीची आहेत. 

हेही वाचा : मला बळीचा बकरा बनवलं जातंय...

दरम्यान, सचिन वाझे, बडतर्फ कॉन्स्टेबल विनायक शिंदे, बुकी नरेश गोरे व अन्य काही जणांची डीएनए चाचणी करण्यात येणार आहे. त्यासाठी एनआयएचे अधिकारी या सर्वांचे डीएनए नमुने घेऊन न्यायवैद्यक प्रयोगशाळेत गेल्याची माहिती मिळत आहे. या प्रकरणात ताब्यात घेतलेल्या गाड्यांमधून न्यायवैद्यक पथकाला मिळालेल्या पुराव्यामधील डीएनए व संशयित आरोपींचे डीएनए यांची पडताळणी करण्यात येणार आहे. हा अहवाल एक ते दोन दिवसांत मिळण्याची शक्यता आहे. मनसुख हिरेन हत्येच्या गुन्ह्यामध्ये दोन मर्सिडिज, एक इनोव्हा वापरली गेली, असा संशय आहे. एनआयएने ताब्यात घेतलेल्या व्होल्व्हो व प्राडो या दोन गाड्यांमधूनही नमुने न्यायवैद्यक पथकाने घेतले आहेत. 

 

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख