भावी शिक्षकांना पोलिसांनी घातल्या लाथा अन् लाठ्या तुटेपर्यंत मारलं!

लखनऊ : शिक्षक भरतीसाठी (Teachers Recruitment) बेरोजगार तरूणांनी काढलेल्या मोर्चावर पोलिसांनी अमानुषपणे लाठीमार केल्याची घटना लखनऊ (Lucknow) येथे घडली आहे. या घटनेचा व्हि़डीओ प्रचंड व्हायरल झाला असून त्यावर आता राजकारण तापलं आहे. पोलिस रस्त्यावर पडलेल्या तरूणांना लाथा घालताना, लाठ्या तुटेपर्यंत मारताना दिसत आहेत. तसेच तरूणांच्या मागे पळत त्यांना पकडून मारले जात असल्याचेही व्हिडीओमध्ये दिसत आहे.

व्हायरल झालेल्या व्हिडीओ शनिवारी रात्रीचा असल्याचा दावा केला जात आहे. उत्तर प्रदेशात (Uttar Pradesh) 2019 मध्ये सहायक शिक्षक पदाच्या तब्बल 69 हजार पदांसाठी भरती प्रक्रिया राबवण्यात आली होती. त्यानंतर काही दिवसांतच या प्रक्रियेमध्ये मोठ्या प्रमाणात अनियमितता झाल्याचे समोर आले. आरक्षणाचा कोटा आणि गुणवत्ता यादीमध्ये घोळ झाल्याचा आरोप करण्यात आला.

त्यानंतर निवड न झालेल्या उमेदवारांनी ही प्रक्रिया स्थगित करून चौकशी करण्याची मागणी सुरू केली. मागील दोन वर्षांपासून एससी आणि ओबीसीतील अनेक तरूण त्यासाठी सरकारशी लढा देत आहेत. शनिवारी तरूणांनी मुख्यमंत्र्यांच्या निवासस्थानावर मेणबत्ती मोर्चा काढला होता. पण पोलिसांनी मोर्चाला रस्त्त्यातच अडवून लाठीमार सुरू केल्याचे सांगितले जात आहे.

या घटनेचा व्हिडीओ सोशल मीडियात प्रचंड व्हायरल झाला असून उत्तर प्रदेशातील राजकारण तापलं आहे. समाजवादी पक्षाने हा व्हिडीओ ट्विट करून मुख्यमंत्री योगी आदित्यनाथांवर (Yogi Adityanath) टीका केली आहे. मागासवर्गीय व दलितांचे आरक्षण न देणारे मुख्यमंत्री शिक्षकांवर लाठी चालवत असल्याचे समाजवादी पक्षाने म्हटलं आहे. माजी मुख्यमंत्री अखिलेश यादव यांनीही टीका केली आहे.

भाजपच्या राज्यात भावी शिक्षकांवर लाठ्या चालवून विश्वगुरू बनण्याचा मार्ग प्रशस्त केला जात आहे. आम्ही 69 हजार शिक्षक भरतीच्या मागणीसोबत आहोत. आजचा युवक म्हणतो, आता भाजप नको, असं ट्विट यादव यांनी केलं आहे. आपचे खासदार संजय सिंग यांनीही मुख्यमंत्र्यांना लक्ष्य कलं आहे. आदित्यनाथजी बेरोजगार तरूणांनी मारा पण लक्षात ठेवा, याच तरूणांनी तुम्हाला सत्तेत बसवलं आहे. बेरोजगारांवर होत असलेले अत्याचार तुमच्या सत्तेचा शेवट करेल, असे संजय सिंग यांनी केलेल्या ट्विटमध्ये म्हटले आहे.