मामांनी सात महिन्यांत नारळ फोडण्याशिवाय दुसरे काय केले? - kamal nath targets madhya pradesh chief minister shivraj singh chouhan | Politics Marathi News - Sarkarnama

मामांनी सात महिन्यांत नारळ फोडण्याशिवाय दुसरे काय केले?

वृत्तसंस्था
शनिवार, 17 ऑक्टोबर 2020

मध्य प्रदेशातील विधानसभा पोटनिवडणुकांचा जोरदार प्रचार सुरू झाला आहे. काँग्रेसने मुख्यमंत्री शिवराजसिंह चौहान यांना लक्ष्य करण्यास सुरूवात केली आहे. 

भोपाळ : मध्य प्रदेशात 28 विधानसभा मतदारसंघात पोटनिवडणुका होत असून, सत्ताधारी आणि विरोधकांमध्ये आरोप-प्रत्यारोपांच्या फैरी सुरू झाल्या आहेत. काँग्रेसने आज निवडणूक जाहीरनामा प्रसिद्ध केला. या वेळी काँग्रेस नेते कमलनाथ यांनी मुख्यमंत्री शिवराजसिंह चौहान यांच्यावर कडाडून हल्ला चढवला. निवडणूक आली की भाजपकडून पाकिस्तान आणि चीनचा मुद्दा उकरुन काढला जात आहे, असा आरोपही त्यांनी केला. 

मध्य प्रदेशातील राजकीय वातावरण आता पुन्हा तापू लागले आहे. राज्यात 28 विधानसभा मतदारसंघात पोटनिवडणुका होत आहे. या निवडणुका 9 नोव्हेंबरला  होत आहेत. काँग्रेसचे सरकार पाडणाऱ्या भाजपला धडा शिकवण्यासाठी काँग्रेस नेते व माजी मुख्यमंत्री कमलनाथ यांनी कंबर कसली आहे. राज्यातील भाजप नेत्यांना फोडून ते मुख्यमंत्री शिवराजसिंह चौहान आणि ज्योतिरादित्य शिंदे यांना अडचणीत आणण्याचा प्रयत्न करीत आहेत.  

जोतिरादित्य शिंदे यांनी काँग्रेस सोडून भाजपमध्ये प्रवेश केला होता. त्यावेळी त्यांच्यासोबत 22 आमदार काँग्रेसमधून भाजपमध्ये गेले होते. त्यामुळे कमलनाथ यांच्या नेतृत्वाखालील सरकार पडले होते. आता राज्यात एकूण 28 मतदारसंघात पोटनिवडणुका होत आहेत. यातील तब्बल 16 ग्वाल्हेर भागातील आहेत. शिंदे यांच्या ग्वाल्हेर या बालेकिल्ल्यात कमलनाथ यांनी काही दिवसांपूर्वी जोरदार शक्तिप्रदर्शनही केले होते. 

काँग्रेसने आज पोटनिवडणुकांसाठी जाहीरनामा प्रसिद्ध केला. या वेळी बोलताना कमलनाथ, माजी मुख्यमंत्री दिग्विजयसिंह, आमदार जितू पटवारी यांच्यासह इतर नेते उपस्थित होते. काँग्रेसने जाहीरनाम्यात शेतकऱ्यांना अनेक आश्वासने दिली आहेत.  

कमलनाथ यांनी मुख्यमंत्री चौहान यांच्यावर निशाणा साधला. ते म्हणाले की, शिवराजसिंह चौहानांनी नारळ फोडणे, बनावट घोषणा आणि पायाभरणी करणे याशिवाय सात महिन्यांत दुसरे काहीही केलेले नाही. निवडणूक आली की पाकिस्तान आणि चीनचा मुद्दा उपस्थित करुन जनतेचे लक्ष विचलित केले जाते. ते आताही जनतेचे लक्ष दुसरीकडे वळवत आहेत. शिवराज हे दिशाभूल करणाऱ्या राजकारणात माहीर आहेत.  

शिवराज म्हणतात की काँग्रेसने शेतकऱ्यांचे कर्ज माफ केले नाही. परंतु, त्यांचाच मंत्री सभागृहात शेतकऱ्यांचे कर्ज माफ झाल्याची कबुली देतो. यातून मुख्यमंत्र्यांचा खोटेपणा उघड झाला आहे, असे कमलनाथ यांनी स्पष्ट केले. 

Edited by Sanjay Jadhav

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख