अर्णब गोस्वामींची दिवाळी तुरुंगातच जाणार..? - if arguments not finished today arnab goswami will be in jail during diwali | Politics Marathi News - Sarkarnama

अर्णब गोस्वामींची दिवाळी तुरुंगातच जाणार..?

वृत्तसंस्था
शनिवार, 7 नोव्हेंबर 2020

रिपब्लिक टीव्हीचे संपादक अर्णब गोस्वामी यांच्या अटकेवरुन गदारोळ सुरू आहे. गोस्वामी यांनी या प्रकरणी उच्च न्यायालयात धाव घेतली होती. 

मुंबई : रिपब्लिक टीव्हीचे संपादक अर्णब गोस्वामी यांच्या अटकेच्या मुद्द्यावरुन मोठा गदारोळ सुरू आहे. गोस्वामी यांची 14 दिवसांसाठी न्यायालयीन कोठडीत रवानगी केली होती. अटकेच्या विरोधात गोस्वामी यांनी उच्च न्यायालयात धाव घेतली आहे. यावर आज सुनावणी सुरू असून, उच्च न्यायालयाने आजच्या आज युक्तिवाद पूर्ण न झाल्यास हिवाळी सुटीनंतरच सुनावणी घेण्यात येईल, असे सांगितले आहे. यामुळे गोस्वामींची दिवाळी तुरुंगातच जाण्याची शक्यता निर्माण झाली आहे. 

गोस्वामी यांना वरळीतील निवासस्थानातून 4 नोव्हेंबरला अटक करुन अलिबाग जिल्हा न्यायालयात हजर करण्यात आले होते. न्यायालयाने गोस्वामी यांनी रवानगी 14 दिवसांसाठी न्यायालयीन कोठडीत केली होती. यामुळे त्यांचा मुक्काम सध्या तुरुंगात आहे. गोस्वामी यांनी अटकेला उच्च न्यायालयात आव्हान दिले होते. 

उच्च न्यायालयात यावर काल सुनावणी झाली होती. गोस्वामी यांनी अटकेला आव्हान देऊन या प्रकरणातून तात्पुरता दिलासा देण्याची मागणी केली आहे. उच्च न्यायालयाने या प्रकरणाची सुनावणी काल तहकूब करीत आज दुपारी ठेवली होती. उच्च न्यायालयाचे न्यायाधीश एस.एस.शिंदे आणि एम.एस.कर्णिक यांच्यासमोर आज ही सुनावणी अद्याप सुरू आहे. 

उच्च न्यायालयाने दोन्ही बाजूंच्या वकिलांना आजच्या आज युक्तिवाद संपवण्यास सांगितले आहे. कारण उद्या रविवार असून, त्यानंतर न्यायालयाच्या हिवाळी सुट्या सुरू होत आहेत. उद्या या प्रकरणी सुनावणी घेणार नसल्याचे न्यायालयाने आताच स्पष्ट केले आहे. आजच्या आज युक्तिवाद पूर्ण न झाल्यास हिवाळी सुटीनंतर या प्रकरणाची सुनावणी 23 नोव्हेंबरला घेण्यात येईल, असे न्यायालयाने म्हटले आहे. यामुळे गोस्वामी यांच्या जामिनावरील युक्तिवाद आज पूर्ण झाला नाही तर पुढील सुनावणी हिवाळी सुटीनंतर होईल. यामुळे गोस्वामी यांची दिवाळी तुरुंगातच जाण्याची शक्यता निर्माण झाली आहे. 

इंटेरिअर डिझायनर अन्वय नाईक व त्यांची आई कुमुद नाईक यांच्या २०१८ मध्ये झालेल्या मृत्युप्रकरणी रिपब्लिक टिव्हीचे संपादक अर्णब गोस्वामी यांना बुधवारी (ता.4) महाराष्ट्र पोलिसांनी अटक केली होती. इंटेरिअर डिझायनर अन्वय नाईक व त्यांच्या मातोश्री कुमुद नाईक हे दोघे २०१८ मध्ये अलिबाग येथे मृतावस्थेत सापडले होते. या दोघांनीही आत्महत्या केली होती. 

त्यावेळी पोलिसांना अन्वय यांनी लिहिलेली चिठ्ठी सापडली होती. अर्णब गोस्वामी व अन्य दोघांनी आपणास व्यवहाराचे ५ कोटी ४० लाख रुपये न दिल्याने आपण आर्थिक अडचणीत आलो असून, त्यामुळे आत्महत्या करावी लागत असल्याचे या चिठ्ठीत म्हटले होते. त्यावेळी पोलिसांनी अर्णब यांच्या विरोधात अन्वय व त्यांच्या आईला आत्महत्येस प्रवृत्त केल्याचा गुन्हा नोंदवला होता. ही फाईल नंतर बंद करण्यात आली. या वर्षीच्या मे महिन्यात अन्वय यांची कन्या अज्ञा नाईक हिने हा तपास नीट झाला नसल्याची तक्रार केल्यानंतर गृहमंत्री अनिल देशमुख यांनी या प्रकरणी सीआयडी चौकशीचा आदेश दिला होता. 

Edited by Sanjay Jadhav

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख