डोकी फोडण्याचा आदेश देणाऱ्या उपजिल्हाधिकाऱ्याला सरकारनं घातलं पाठीशी

शेतकऱ्यांवर लाठीहल्ला करुन त्यांची डोकी फोडण्याचा आदेश उपजिल्हाधिकाऱ्यांनी पोलिसांना दिल्याचा धक्कादायक प्रकार समोर आला होता.
डोकी फोडण्याचा आदेश देणाऱ्या उपजिल्हाधिकाऱ्याला सरकारनं घातलं पाठीशी
haryana home minister anil vij clarifies about action against ayush sinha

चंडीगड : शेतकऱ्यांवर (Farmers) लाठीहल्ला (Lathicharge) करुन त्यांची डोकी फोडण्याचा आदेश उपजिल्हाधिकाऱ्यांनी पोलिसांना (Police) दिल्याचा धक्कादायक प्रकार समोर आला होता. या आदेशानंतर शेतकऱ्यांवर लाठीहल्ला होऊन यात एकाचा मृत्यू  तर काही शेतकऱ्यांची डोकीही फुटली होती. या प्रकरणी हा आयएएस अधिकारी (IAS Officer) अडचणीत आला असला तरी राज्य सरकारने त्यांना पाठीशी घालण्याची भूमिका घेतल्याने खळबळ उडाली आहे. 

हरयाणा राज्यातील करनाल जिल्ह्यात 28 ऑगस्टला हा प्रकार घडला आहे. उपजिल्हाधिकारी आयुष्य सिन्हा यांचा या आदेशाबाबतचा व्हिडीओही मोठ्या प्रमाणावर व्हायरल झाला आहे. भाजपचे खासदार वरूण गांधी यांनीही या व्हिडीओ ट्विट करून संताप व्यक्त केला होता. तसेच, सोशल मीडियावर सिन्हा यांचा हा व्हिडीओ मोठ्या प्रमाणात शेअर झाला होता आणि तीव्र प्रतिक्रिया उमटल्या होत्या. 

हरियानातील भाजप सरकारने सिन्हा यांना पाठिशी घालण्याचा निर्णय घेतला आहे. याबाबत बोलताना हरियानाचे गृहमंत्री अनिल वीज म्हणाले की, केवळ आयुष सिन्हाच नव्हे तर करनालमधील संपूर्ण घटनेची चौकशी केली जाणार आहे. चौकशीशिवाय कुणालाच शिक्षा केली जाणार नाही. यात शेतकरी नेते दोषी आढळल्यास त्यांच्यावरही कारवाई करण्यात येईल. 

कृषी कायद्यांविरोधात 28 ऑगस्टला शेतकऱ्यांनी भाजप नेत्यांविरोधात आंदोलन केले. या आंदोलनावर पोलिसांनी लाठीहल्ला केला. अनेक शेतकऱ्यांचा पाठलाग करून त्यांच्यावर लाठ्या चालवण्यात आल्याचा आरोप शेतकरी संघटनांनी केला आहे. या हल्ल्यात एका शेतकऱ्याचा मृत्यू तर किमान 10 शेतकरी गंभीररीत्या जखमी झाले होते. यामुळे शेतकरी आणि सरकारमधील संघर्ष आणखी चिघळला आहे. नंतर सिन्हा यांनीच लाठीहल्ल्याचे आदेश दिल्याचा व्हिडीओ व्हायरल झाला होता. 

काय म्हणाले आहेत आयुष सिन्हा?
आयुष सिन्हा पोलिसांना आदेश देताना त्यांच्या मागून हा व्हिडीओ घेण्यात आला आहे. ते म्हणतात, कोणीही शेतकरी बॅरिकेड पार करता कामा नये. सगळं स्पष्ट आहे. कुणी कुठूनही असो, त्याच्यापुढे जाऊ देऊ नका. जर कुणी जात असेल तर काठीने डोकं फोडा. कोणत्याही आदेशाची गरज नाही. पकडून-पकडून मारा. कोणत्याही परिस्थितीत सुरक्षा टिकली पाहिजे. आपल्याकडे अतिरिक्त फोर्स आहे. तुम्ही हेल्मेट घाला. आम्ही पूर्ण रात्र झोपलो नाही. दोन दिवसांपासून ड्यूटी करतोय. सर्व काही स्पष्ट काही ना? इथून पुढे कुणी गेलं तर त्याचं डोकं फुटलेलं दिसायला हवं, असं सिन्हा म्हणत आहेत.

Related Stories

No stories found.
Sarkarnama
www.sarkarnama.in