भाजप प्रवेशाचा दावा होणाऱ्या अभिजित पाटलांची पवारांसमवेत राष्ट्रवादीच्या कार्यक्रमाला हजेरी

सोलापूर : पंढरपूर (Pandharpur) तालुक्यातील विठ्ठल सहकारी साखर कारखान्याचे अध्यक्ष अभिजित पाटील (Abhijit Patil) हे काही दिवसांतच भारतीय जनता पक्षात (BJP) प्रवेश करतील, असा जाहीर दावा आमदार प्रवीण दरेकर (Praveen Darekar) यांनी पंढरपुरात येऊन केला होता. मात्र, त्याच अभिजित पाटील यांनी आज (ता. १९ सप्टेंबर) कुर्डूवाडी येथील शरद पवार (Sharad Pawar) यांच्या कार्यक्रमाला हजेरी लावली. नुसतीच हजेरीच नाही तर व्यासपीठावरच पवार यांच्याशी हितगुजही केले. त्यामुळे भाजप प्रवेश करण्याचा दावा होत असलेल्या पाटील यांच्या राष्ट्रवादीच्या (NCP) व्यासपीठावरील उपस्थितीने राजकीय निरीक्षकांच्या भूवया उंचावल्या आहेत. (Abhijit Patil attends Sharad Pawar's program at Kurduwadi)

अभिजित पाटील यांचे कारखाने पंढरपूरमधील घर आणि पतसंस्थेच्या कार्यालयावर प्राप्तीकर विभागाने २५ ऑगस्ट रोजी छापेमारी केली होती. त्यानंतर २९ ऑगस्ट रोजी विधान परिषदेतील माजी विरोधी पक्षनेते तथा आमदार प्रवीण दरेकर हे तिरंगा रॅलीसाठी पंढरपुरात आले होते. त्यावेळी अभिजित पाटील आणि दरेकर यांची भेट झाली होती. त्यावेळी दरेकर यांनी ‘अभिजित पाटील हे लवकरच भाजपमध्ये येतील’ असा विश्वास व्यक्त केला होता.

अभिजित पाटील यांचे कारखाने आणि घरांवर पडलेले प्राप्तीकर विभागाचे छापे आणि त्यानंतर दरेकर यांनी त्यांच्या भाजप प्रवेशाचा केलेला दावा यामुळे ते लवकरच भाजपमध्ये प्रवेश करतील, अशी चर्चा सोलापूर जिल्ह्यात रंगली होती. मात्र, त्यांनी आपले पत्ते ओपन केले नव्हते. पण, आज त्यांनी राष्ट्रवादीच्या कार्यक्रमाला हजेरी लावून पुन्हा सर्वांना आश्चर्याचा धक्का दिला आहे.

माढ्याचे राष्ट्रवादीचे आमदार बबनराव शिंदे यांचे वडिल विठ्ठलराव शिंदे यांच्या पृर्णाकृती पुतळ्याचे अनावरण आज ज्येष्ठ नेते शरद पवार यांच्या हस्ते करण्यात आले. त्या कार्यक्रमासाठी राष्ट्रवादीच्या नेत्यांची उपस्थितीत होती. त्याच व्यासपीठावर कल्याणराव काळे यांच्या शेजारी अभिजित पाटील बसले होते. माजी सामजिक न्यायमंत्री धनंजय मुंडे यांचे भाषण सुरू असताना पाटील यांनी जागेवरून उठून पवार यांच्याशी संवादही साधला. त्या दोघांमधील संवाद बराच वेळा सुरू होता, त्यामुळे त्यांच्या काय बोलणे झाले असावे, याची चर्चा कार्यक्रमस्थळी रंगली होती.

काय म्हणाले होते दरेकर?

पंढरपूरचे अभिजीत पाटील हे माझे चांगले मित्र आहेत. ते एक तरूण उद्योजक आहेत. त्यांना साखर कारखाने चालवण्याचा चांगलाच अनुभव आहे. त्यांच्या पाठीशी मी उभा आहे. मुंबई बॅंकेनेदेखील पाटील यांना मदत केलेली आहे. या चौकशीच्या फेऱ्यातून ते लवकरच बाहेर पडतील, अशी क्लिनचीट देत अभिजीत पाटील लवकरच भाजपमध्ये येतील, असा दावा प्रवीण दरेकर यांनी २९ ऑगस्ट रोजी पंढरपुरात बोलताना केला होता.