बाळासाहेब थोरात बाजीप्रभू होऊ शकत नाहीत!

श्रीरामपूर (नगर) : बाळासाहेब थोरात बाजीप्रभू होऊच शकत नाहीत. त्यांच्या आसपासही जावू शकत नाही. शिवरायांसाठी त्यांनी आपले बलिदान दिले. इथे तर त्यांचा नेताच बॅंकाकला पळून गेला, तर तुम्हा काय लढणार, असा टोला शिवसेनेचे कार्याध्यक्ष उद्धव ठाकरे यांनी आज विरोधकांना लगावला.

विधानसभा निवडणुकीनिमित्त शिवसेनेचे उमेदवार भाऊसाहेब कांबळे यांच्या प्रचाराचा प्रारंभ आज मतदार जनाबाई तुपे यांच्या हस्ते तसेच ठाकरे यांच्या उपस्थितीत झाला. त्यावेळी झालेल्या जाहिर सभेत ते बोलत होते. गृहनिर्माण मंत्री राधाकृष्ण विखे पाटील, खासदार सदाशिव लोखंडे, सुजय विखे, कांबळे, माजी खासदार भाऊसाहेब वाकचौरे, माजी आमदार भानुदास मुरकुटे, चंद्रशेखर कदम, मिलिंद नार्वेकर, शिवसेनेचे जिल्हाध्यक्ष रावसाहेब खेवरे या वेळी उपस्थित होते.

युतीचा मधला काळ थोडा खट्टा मीठ्ठा होता. युती होती पण व नव्हती पण. आता एका विचाराने आम्ही एकत्र आलो आहोत, असे सांगून ठाकरे म्हणाले, काँग्रेस राष्ट्रवादीने इतके दिवस मृगजळ दाखविले. लोकांना झुलवत ठेवले. त्यामुळे लोकसभा निवडणुकीत त्यांची काय अवस्था झाली. निवडणुकीसाठी त्यांना स्थानिक उमेदवार मिळाला नाही. तुमच्यात दम नाही, आम्ही ती हिम्मत दाखविली. कांबळे यांना उमेदवारी दिली. विखे, मुरकुटे त्यांच्यासोबत असल्याने मला चिंता नाही. सुशिलकुमार शिंदे कधी खोटे बोलत नाहीत. आम्ही थकल्याची कबुली त्यांनी दिली. निवडणुकीत एकत्र येण्यापुरते तरी त्यांचे संख्याबळ होईल की नाही, अशी शंका आहे. निवडणुकीनंतर या दोन्ही पक्षातील उर्वरित नेतेही युतीत सामील होतील, अशी शक्यता त्यांनी वर्तविली.