राष्ट्रवादीच्या कोट्यातून आमदारपदी गायक आनंद शिंदे..?

पुणे : प्रसिद्ध गायक आनंद शिंदे यांनी राष्ट्रवादी काँग्रेसचे अध्यक्ष खासदार शरद पवार यांची कलावंतांच्या प्रश्नावर भेट घेतली. ही भेट कलावंतांचे प्रश्न मांडणारी होती. मात्र, या भेटीनंतर आनंद शिंदे यांना राष्ट्रवादीच्या कोट्यातून राज्यपालनियुक्त आमदारपदी संधी मिळणार अशी चर्चा सुरू झाली आहे.

आनंद शिंदे यांनी कोरोनाच्या काळात कलावंतांना कोणत्या अडचणींना सामोरे जावे लागले हे सांगण्यासाठी, कलावंतांच्या व्यथा मांडण्यासाठी शरद पवार यांची भेट घेतली. या भेटीनंतर मात्र राज्यपालनियुक्त विधानपरिषद जागेवर राष्ट्रवादी काँग्रेसच्या कोट्यातून आनंद शिंदे यांना संधी मिळणार काय अशा चर्चा सुरू झाल्या आहेत. आनंद शिंदे यांनी मोहोळ मतदारसंघातून त्यांचे सुपुत्र उत्कर्ष शिंदे यांना राष्ट्रवादी काँग्रेसकडे उमेदवारी मागितली होती. पण मोहोळमधून यशवंत माने यांना राष्ट्रवादी कॉंग्रेसने उमेदवारी दिली.

महाराष्ट्रात सध्या राज्यपालनियुक्त विधानपरिषद जागांची चर्चा आहे. या जागांवर वर्णी लावण्यासाठी अनेकांनी फिल्डिंग लावली आहे. सुप्रसिद्ध गायक आनंद शिंदे यांच्याही नावाची चर्चा विधानपरिषद जागेसाठी आहे. याचदरम्यान त्यांनी शरद पवार यांची भेट घेतल्याने राष्ट्रवादीच्या कोट्यातून आनंद शिंदे यांना विधानपरिषदेवर संधी मिळणार काय ? याची चर्चा सुरू झाली आहे. आनंद शिंदे भेटले कलावंताच्या प्रश्नांसाठी. मात्र, चर्चा मात्र विधानपरिषदेची सुरू झाली आहे  दरम्यान सरकारनामाने आनंद शिंदे यांच्याशी संपर्क साधला असता, त्यांनी "मी शरद पवार यांच्याकडे कलावंताचे प्रश्न घेऊन गेलो होतो. कलावंताचे प्रश्न सुटावेत, अशी माझी इच्छा आहे. विधानपरिषदेबाबत कोठे काय चर्चा सुरू आहेत हे मला माहिती नाही," असे सांगितले.
    
 

हेही वाचा : राष्ट्रवादी काँग्रेस ओबीसी विभागाच्या सरचिटणीसपदी लतीफ तांबोळी 

मंगळवेढा: सोलापूर जिल्हा राष्ट्रवादी कॉंग्रेसच्या ओ.बी.सी विभागाचे जिल्हाध्यक्ष लतीफ तांबोळी यांची महाराष्ट्र प्रदेश राष्ट्रवादी काँग्रेसच्या ओबीसी विभागाच्या सरचिटणीसपदी निवड करण्यात आल्याचे पत्र राज्यध्यक्ष ईश्वर बाळबुध्दे यांनी दिले. त्यांच्या निवडीबद्दल आमदार भारत भालके यांच्या हस्ते त्यांचा सत्कार करण्यात आला. यावेळी तालुकाध्यक्ष सुनील डोके, डोके, भारत बेदरे,अशोक माने उपस्थित होते. त्यांच्या निवडीनंतर दुष्काळी तालुक्यातील चळवळीतील कार्यकर्त्याला राज्य स्तरावर काम करण्याची संधी मिळाल्याने आनंद व्यक्त केला जात आहे.