राज्यपालांनी कंगनाची कान उघाडणी केली असती, तर आनंद झाला असता..

मुंबई : अभिनेत्री कंगना राणावतने राज्यपाल भगतसिंह कोश्यारी यांची भेट घेतली होती. यावरून आता काँग्रेसचे नेते सचिन सावंत यांनी राज्यपालावर टिका केली आहे. याबाबतचं टि्वट सावंत यांनी केलं आहे. कंगनानं राज्यपाल कोश्‍यारी यांची भेट घेऊन आपल्यावर शिवसेना आणि ठाकरे सरकार कसा अन्याय करते याचा पाढाही वाचला होता. मुंबई सोडण्याची घोषणा करेपर्यंत तिने शिवसेनेला लक्ष्य करणे सुरूच ठेवले होते. 

ट्‌विटमध्ये कंगना म्हटलं होते की मुंबई सोडण्याचा निर्णय मी घेत आहे याचे मला खूप दु:ख होत आहे. ती हिमाचल प्रदेशमधील आपल्या घरी परतली आहे. मुंबईला पीओकेशी तुलना केल्यानंतर मला शिव्याशाप देण्यात आले. मला लक्ष्य करण्यात आले. माझे घर पाडले त्यामुळे मी प्रचंड तणावाखाली होते. या सर्व प्रकरणात मला सुरक्षा व्यवस्था देण्यात आली आहे. माझ्यावर जे आरोप होत आहेत. सतत जे हल्ले होत आहेत. त्याची मला भिती वाटत असल्याने शेवटी मी मुंबई सोडण्याचा निर्णय घेतला आहे. त्या मनाला खूप दु:ख होत असल्याचेही तिने म्हटलं होतं 

या पार्श्वभूमीवर सावंत यांनी टि्वट केलं आहे. आपल्या टि्वटमध्ये सचिन सावंत म्हणतात की महामहिम राज्यपाल उत्तराखंडचे असले तरी आता ते सर्वस्वी महाराष्ट्राचे आहेत. तसेच ते संविधानाच्या दृष्टिने महाराष्ट्र राज्याचे प्रमुख आहेत. सर्वांनाच त्यांच्याबद्दल नितांत आदर आहे. त्यातही महाराष्ट्राच्या मुख्यमंत्रीपदाची प्रतिष्ठा रक्षणाची जबाबदारी राज्याचे प्रमुख राज्यपालांची असते. मुंबई पोलिसांना बदनाम करणाऱ्या, मुंबईला पाकिस्तान म्हणून महाराष्ट्राचा अपमान करणाऱ्या व महाराष्ट्राच्या मुख्यमंत्र्यांचा एकेरी उल्लेख करुन गलिच्छ भाषेत अपमान करणाऱ्या कंगना राणावतला त्यांनी तातडीने भेट दिली याचा खेद वाटतो. राज्यपालांवर याबाबत दबाव होता का ? हा संदेह जनतेत आहे.  
 
"जरी राज्यपालांना तिला भेट दिली तरी ज्या त्वरेने अजोय मेहतांना बोलावणे धाडले तशीच तिची कान उघाडणी केली असती तरी महाराष्ट्राच्या जनतेला आनंद झाला असता. पण राज्यपाल आसनस्थ होण्याआधी बसून कंगनाने आमच्या महाराष्ट्राच्या राज्यपालांचाही आदर राखला नाही याची खदखद आमच्या मनात व जनमानसात आहे, असे सचिन सावंत यांनी म्हटलं आहे.