बुलडाणा : कोरोना या जीवघेण्या संकटाच्या काळात नातेवाईकांनी मृत्युनंतर पाठ फिरविली.. मात्र बुलडाण्याचे आमदार संजय गायकवाड यांनी कोरोनाने मृत्युमुखी पडलेल्यांच्या अंत्यसंस्कारानंतरचा रक्षा विसर्जनाचा विधी कार्यकर्त्यांसह जाऊन स्वतः पार पाडला. त्यामुळे मृत्यूनंतर आप्तस्वकीयांनी नाकारलेल्यांना आमदार गायकवाड यांनी स्वीकारल्याची शहरात चर्चा आहे.
येथील त्रिशरण चौकात हिंदू स्मशानभूमी आहे. याठिकाणी कोरोनाग्रस्त मृत्युमुखी पडलेल्या अनेकांवर अंत्यसंस्कार करण्यात आले. काही वेळा एखाद-दुसरा नातेवाईक उपस्थित असेलही. परंतु बहुतांश वेळा शासकीय कर्मचाऱ्यांनीच हा विधी उरकला होता. अशा अनेक अंत्यसंस्कारानंतर त्यांचे रक्षाविसर्जन करण्याचे सोपस्कारही नातेवाईकांनी पार पाडले नाहीत. ही बाब लक्षात येताच आमदार संजय गायकवाड यांनी हेच अंतिम संस्कार विधी पार पाडण्याचे ठरविले. त्यानुसार त्यांनी आपल्या कार्यकर्त्यांसह जाऊन आज त्रिशरण चौकातील स्मशानभूमीमध्ये त्यांच्या रक्षा विसर्जनाचे दायित्व पार पाडले.
अग्नित जळलेल्या देहात विषाणू कसे?
एकीकडे कोरोनाच्या प्रतिबंधासाठी गरम पाणी प्या, वाफ घ्या असे सांगितले जाते. मात्र जो मृतदेह अनेक तास अग्निकुंडात जळतो. त्यानंतर त्या ठिकाणी एकही विषाणू राहत नाही. याचा विचार न करता अनेक नातेवाईकांनी रक्षाविसर्जन हा विधी पारच पाडला नाही. तो संकल्प गायकवाड यांनी केला व सहकाऱ्यांसह जाऊन त्यांनी मृतकांच्या अस्थी स्वतः गोळा करून व त्या ठिकाणी स्वच्छता करून त्या अस्थिचे जलाशयामध्ये विसर्जन केले.
पुण्यात कोरोना कमी होतोय!
पुणे जिल्ह्यात मागील आठवडाभरापासून दररोज सापडणाऱ्या नव्या कोरोना रुग्णांचे प्रमाण कमी होत असून, याऊलट कोरोनामुक्त होणाऱ्या रुग्णांचे प्रमाण वाढत आहे. शिवाय रुग्णालयांत उपचार घेणाऱ्या रुग्णांचे प्रमाणही वेगाने कमी होऊ लागले आहे. पुणेकरांसाठी ही दिलासादायक बाब आहे.यामुळे पुणे जिल्ह्यात कोरोना कमी होत असल्याची चिन्हे दिसू लागली आहेत. जिल्ह्यात काल 2 हजार 390 नवे रुग्ण सापडले असून, 2 हजार 952 कोरोनामुक्त झाले आहेत. यामुळे आजअखेरपर्यंतच्या एकूण रुग्णांची संख्या आता 2 लाख 91 हजार 638 झाली आहे. याशिवाय 2 लाख 47 हजार 931 रुग्ण उपचारानंतर पूर्णपणे बरे झाले आहेत. सद्यःस्थितीत जिल्ह्यात केवळ 37 हजार 106 सक्रिय (पॉझिटिव्ह) कोरोना रुग्ण आहेत. यापैकी 21 हजार 159 रुग्ण विविध रुग्णालयात उपचार घेत आहेत.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.