दहा रुपयासाठी दारु विक्रेत्याने एकाला पेट्रोल टाकून पेटविले.. 

बुलडाणा : जिल्ह्यातील दारूचे उधारीचे पैसे देत नसल्याच्या कारणावरून अवैध दारू विक्रेत्याने एकाच्या अंगावर पेट्रोल टाकून जिवंत जाळण्याचा प्रयत्न केल्याची घटना मलकापूर तालुक्यातील ग्राम देवधाबा येथे रात्री नऊ वाजता घडली. 

मलकापुर तालुक्यात अवैध धंद्यावाल्यांनी डोके वर काढले आहेत. ग्राम देवधाबा मोठ्या प्रमाणात अवैध दारूविक्री होत आहे. दारु विक्रेत्यांची ऊधारीचे पैसै वसुल करण्यासाठी जिवंत माणसाला जाळण्यापर्यंत मजल पोहचली आहे.

देवधाबा येथील काशिनाथ राजाराम उगले (वय ४५) हे गावातील अशोक गणपत  भिसे यांचे घरी दारु पिण्यासाठी गेले. त्यांनी दारु मागितली असता यावेळी भिसे याने मागील ऊधारीचे दहा रुपये दे मग दारु देतो, असे म्हटले. यामुळे दोघांमध्ये वाद झाला. अशोक भिसे याने घरात जाऊन बिसलरी बाटलीमध्ये पेट्रोल आणले व काशिनाथ राजाराम उगले याच्या अंगावर पेट्रोल टाकून माचिस लावून पेटवून दिले. यात उगले गंभीर जळाला.

त्याला जिवानिशी ठार मारण्याचा प्रयत्न केला याबाबतची तक्रार काशिनाथ राजाराम उगले यांनी ग्रामीण पोलिसांना दिली आहे. ग्रामीण पोलिसांनी अशोक भिसे याच्या विरुद्ध कलम 307 अन्वये गुन्हा दाखल केला आहे. ग्रामीण पोलिसांनी अशोक भिसे यास अटक केली आहे. काल त्याला न्यायालयासमोर उभे केले असता न्यायालयाने दोन दिवसाची पोलीस कोठडी सुनावली आहे. उगले याची प्रकृती चिंताजनक असून त्यांना उपचारार्थ बुलढाणा येथील जिल्हा सामान्य रुग्णालयात दाखल केले आहे पुढील तपास पोलीस उपनिरीक्षक नामदेव तायडे करीत आहे.

अकोला 'झेडपी'चे माजी अध्यक्ष दादा मते पाटील यांचे निधन 
 अकोला : अकोला जिल्हा परिषदेचे माजी अध्यक्ष तथा कॉंग्रेस पक्षाचे ज्येष्ठ नेते विजय ऊर्फ दादाराव नारायणराव मते पाटील यांचे रविवारी (ता. 6 सप्टेंबर) दुपारी निधन झाले. ते 66 वर्षांचे होते. त्यांना शनिवारी (ता. 5 सप्टेंबर) श्वसनाचा त्रास होत असल्याने येथील एक खासगी रुग्णालयात दाखल करण्यात आले होते. त्यांच्या निधनाने जिल्ह्यात कॉंग्रेसला मोठा धक्का बसला आहे. मोठी उमरी ग्रामपंचायतीवर दोन दशके सत्ता गाजविणारे दादा मते पाटील यांनी 1999 मध्ये प्रथमच जिल्हा परिषद निवडणूक लढवी आणि पहिल्याच प्रयत्नांत ते जिल्हा परिषदेचे अध्यक्षही झाले होते. त्यांनी 30 डिसेंबर 1999 ते 29 डिसेंबर 2001 या कालावधीत अकोला जिल्हा परिषदेचे अध्यक्षपद भूषविले. 
अकोला जिल्हा परिषदेवर त्यानंतर कॉंग्रेसची सत्ता आली नाही. त्यांना 2009 च्या विधानसभा निवडणुकीत अकोला पूर्व विधानसभा मतदारसंघातून कॉंग्रेस पक्षाने उमेदवारी दिली होती. मात्र, भारिप-बसंचे हरिदास भदे निवडून आले होते, तर शिवसेनेचे गुलाबराव गावंडे दुसऱ्या स्थानी होते. दादा मते पाटलांना तिसऱ्या क्रमांकाची मते मिळाली होती. त्यापूर्वी ते दोन वेळा मोठी उमरी ग्रामपंचायतीचे सरपंच होते.