मुंबई : आकुर्ली येथे डॉ. बाबासाहेब आंबेडकर सामाजिक केंद्र उभारणी, रामनगर-सावरगाव येथे मुलींचे वसतीगृह चालवणे, कांदिवलीच्या नालंदा बुद्ध विहाराची पुनर्बांधणी आणि मागठाणे येथील दलितवस्ती सुधार योजनेतील कामांना मंजुरी देणे याबाबत सरकार सकारात्मक असून लवकरत यासंदर्भात निर्णय घेतला जाईल, असे आश्वासन सामाजिक न्याय खात्याचे मंत्री धनंजय मुंडे यांनी विधान परिषदेतील विरोधी पक्षनेते प्रवीण दरेकर यांना दिले.
सामाजिक न्याय विभागातील काही महत्त्वाच्या मागण्यांसाठी दरेकर यांनी सामाजिक न्यायमंत्री धनंजय मुंडे यांची भेट घेतली. विरोधी पक्षनेते दरेकर यांनी गेले काही दिवस सामाजिक व न्याय विभागाशी संबंधित असलेल्या विविध मागण्यांचा पत्रव्यवहार करून सातत्याने पाठपुरावा केला होता. त्या मागण्यांबाबत त्यांनी या भेटीत प्रत्यक्ष सविस्तर चर्चा केली.
मौजे आकुर्ली येथे डॉ. बाबासाहेब आंबेडकर सामाजिक केंद्र उभारण्यासाठी विशेष बाब म्हणून मान्यता देण्याची मागणी त्यांनी केली. याबाबत जमीन हस्तांतरण असो किंवा नवीन आराखडा तयार करण्याची बाब असो, यासंदर्भात सरकार सकारात्मक असून लवकरच याबाबतची पुढील दिशा ठरविण्यात येईल, असे आश्वासन मुंडे यांनी दरेकर यांना दिले. अन्य मागण्यांसंदर्भातही लवकरच निर्णय घेतले जातील, असेही मुंडे यांनी त्यांना सांगितले.
सुमन चॅरिटेबल ट्रस्ट यांच्याकडून रामनगर सावरगाव येथील मुलींचे वसतिगृह चालवण्यासाठी प्रस्ताव मिळाला आहे. याबाबत योग्य ती कार्यवाही करण्याचे आश्वासन मुंडे यांनी दिले. मुंबईतील मागाठाणे येथील दलित वस्ती सुधार योजनेतील कामांना मंजुरी देण्याची मागणीही दरेकर यांनी केली. या कामावरील स्थगिती उठवण्याबाबत शासनास कळवण्यात आल्याचेही मुंडे यांनी स्पष्ट केले. कांदिवली पूर्व येथील नालंदा बुद्ध विहाराचे सुशोभीकरण व पुनर्बांधणी यासाठी लवकरच निधी उपलब्ध करून दिला जाईल, असे आश्वासन धनंजय मुंडे यांनी दिले.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.