जुहीला पब्लिसिटी स्टंट पडला महागात; न्यायालयाने ठोठावला 20 लाखांचा दंड - Delhi High Court dismisses the lawsuit filed by actor Juhi Chawla | Politics Marathi News - Sarkarnama

जुहीला पब्लिसिटी स्टंट पडला महागात; न्यायालयाने ठोठावला 20 लाखांचा दंड

वृत्तसंस्था
शुक्रवार, 4 जून 2021

मोबाईल टॅावरमधून बाहेर पडणारे रेडिएशन नागरिकांसाठी असुरक्षित आणि आरोग्यासाठी हानीकारक असल्याचा दावा याचिकेत केला होता.

नवी दिल्ली : भारतातील प्रस्तावित 5G नेटवर्कविरोधात अभिनेत्री जुही चावला यांनी केलेली याचिका दिल्ली उच्च न्यायालयाने फेटाळून लावली आहे. ही याचिका केवळ प्रसिध्दीसाठी केल्याचा ठपका ठेवत न्यायालयाने जुही चावलाला 20 लाख रुपयांचा दंडही ठोठावला आहे. (Delhi High Court dismisses the lawsuit filed by actor Juhi Chawla )

भारतामध्ये पुढील काही वर्षांत 5G नेटवर्क उपलब्ध करून देण्याची तयारी सुरू करण्यात आली. पण याच्या मोबाईल टॅावरमधून बाहेर पडणारे रेडिएशन नागरिकांसाठी असुरक्षित आणि आरोग्यासाठी हानीकारक असल्याचा दावा जुही चावला यांनी याचिकेत केला होता. त्यामुळं याची अंमलबजावणी करण्याआधी रेडिएशन नागरिक व पक्षांसाठी सुरक्षित असल्याची हमी सरकारने द्यावी, तसेच त्याचा खोलवर अभ्यास करावा, असे जुही यांनी याचिकेत म्हटलं होतं. 

हेही वाचा : दिलासादायक : लस घेतलेल्यांना कोरोना संसर्ग झाल्यास मृत्यूचे प्रमाण शुन्य

या याचिकेवर शुक्रवारी झालेल्या सुनावणीदरम्यान न्यायालयाने याचिकेवरच आक्षेप नोंदवला. या याचिकेमध्ये कोणताही ठोस मुद्दा नसून ती अकारण दाखल करण्यात आली आहे. केवळ प्रसिध्दीसाठी ही याचिका दाखल करण्यात आल्याचा ठपका ठेवत न्यायालयाने ही याचिका फेटाळून लावली. तसेच या याचिकेत याचिकाकर्ते असलेल्या जुहीसह सर्वांना 20 लाख रुपयांचा दंड ठोठावला.

काय म्हटलं होतं याचिकेत?

आम्ही तंत्रज्ञानाच्या विरोधात नाही. वायरलेस कम्युनिकेशनच्या क्षेत्रात तंत्रज्ञानामुळे निर्माण झालेल्या अनेक उत्पादनांचा आम्ही वापर करत आहोत. पण हा वापर करताना त्याचा अतिरेक होऊ नये, याकडेही लक्ष्य देण्याची गरज आहे. आपल्याच संशोधन व अभ्यासातून वायरलेस उत्पादने आणि मोबाईल टॅावरमधून निघणाऱ्या रेडिएशन घातक असल्याचे याचिकेत म्हटले होते. 

तसेच 5G तंत्रज्ञान हे नागरिक, पशु-पक्ष्यांसाठी सुरक्षित आहे, ही ग्वाही संबंधित विभागाने द्यावी, अशी मागणीही याचिकेत करण्यात आली आहे. तसेच याच्या अंमलबजावणीचा अभ्यास करण्याची मागणीही त्यांनी केली आहे. यापूर्वी असा अभ्यास झाला नसल्यास सध्याच्या स्थितीत आणि भविष्याचा विचार करून पुरक अभ्यास होण्याची गरज आहे. लहान मुलांचे आरोग्य तसेच भविष्यात जन्माला येणाऱ्या मुलांचाही विचार करण्याची आवश्यकता असल्याची मागणी जुही यांनी केली होती. जुही चावला यांनी यापूर्वीही मोबाईल टॅावरमधून निघणाऱ्या रेडिएशनविरोधा आवाज उठवला आहे. पर्यावरणासाठी काही वर्षांपासून काम करत असून वायरलेस नेटवर्कविरोधात त्यांनी पहिल्यांदाच याचिका दाखल केली होती.

Edited By Rajanand More
 

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख