निलेश राणे म्हणतात..."यांना लाथेनं मारलं पाहिजे..."

मुंबई : शिवसेनेचे ठाण्याचे आमदार प्रताप सरनाईक यांच्या घरावर सक्तवसुली संचनालयाने (ईडी) २४ नोव्हेंबर रोजी छापा टाकला होता. ईडीने आमच्यावर छापे का टाकले हे मलाच माहीत नाही, अशी प्रतिक्रिया सरनाईक यांनी दिली होती. त्यानंतर २६ नोव्हेंबरला सक्तवसुली संचनालयाने (ईडी) सरनाईक यांचे निकटवर्तीय अमित चांदोळे यांना अटक केली. कारवाईनंतर सरनाईक क्वारंटाईन झाले होते. त्यानंतर ते ईडी समोर उपस्थित राहणे आवश्यक होते. मात्र, या कारवाईच्या विरोधात सरनाईक यांनी सर्वोच्च न्यायालयात दाद मागितली होती.गेल्या आठवड्यात प्रताप सरनाईक ईडीच्या चौकशीला सामोरे गेले. 

भाजपचे नेते, माजी खासदार निलेश राणे यांनी प्रताप सरनाईक यांच्यावर निशाणा साधला आहे. निलेश राणे यांनी टि्वट करून सरनाईक यांच्यावर टिकास्त्र सोडले आहे. आपल्या टि्वटमध्ये निलेश राणे म्हणतात, "अशा लोकांना लाथेने तुडवलं पाहिजे. तानाजी मालुसरेंच्या नखाचीही सर नसलेले राष्ट्रवादी काँग्रेस पक्षातून शिवसेनेत गेलेले प्रताप सरनाईक आता महाराजांची आणि त्यांच्या मावळ्यांची बदनामी करत आहेत. तुलना करणं तर सोडून द्या पण एकही मावळ्याचं नाव घ्यायच्या लायकीचे नाहीत सरनाईकसारखी माणसं."

हेही वाचा : प्रताप सरनाईकांचा माध्यमांच्या विरोधात हक्कभंग प्रस्ताव
मुंबई : सध्या ईडीच्या चौकशीच्या फेऱ्यात अडकलेले शिवसेना आमदार प्रताप सरनाईक पुन्हा एकदा आक्रमक झाले आहेत. आपल्या घरात पाकिस्तानी क्रेडिट कार्ड सापडल्याच्या बातम्या देणाऱ्या माध्यमांच्या विरोधात त्यांनी विधानपरिषदेच्या अध्यक्षांकडे हक्कभंग प्रस्ताव सादर केला आहे. मी मुंबईत आल्यावर माझा जबडा तोडणाऱ्यांच्या घरी पाकिस्तानी क्रेडिट कार्ड मिळाले, असे  खोटे ट्विट कंगना राणावत केल्याने माझी व माझ्या कुटुंबीयांची सर्व देशभर बदनामी झाली तसेच मला माझ्या कुटुंबियांना नाहक त्रास झाला, असे सरनाईक यांनी हक्कभंग प्रस्वावात नमूद केले आहे. कंगना राणावतने केलेल्या ट्वीटनंतर काही वृत्तपत्रे, इलेक्ट्राॅनिक प्रसारमाध्यमे आणि डिजिटल माध्यमांनी (सरकारनामा नव्हे) याबाबतच्या बातम्या प्रसिद्ध केल्या होत्या. या बातम्या कुठलीही शहानिशा न करता प्रसिद्ध केल्या गेल्याचे सरनाईक यांचे प्रतिपादन असून या माध्यमांच्या विरोधातही सरनाईक यांनी हक्कभंग दाखल केला आहे. मी सभागृहात हक्कभंग प्रस्ताव सादर केला असून त्याला तात्काळ मंजुरी मिळावी यासाठी मी सभागृहाला विनंती केली आहे. तसेच खोटे ट्वीट करणाऱ्या कंगना राणावतला योग्य ती शिक्षा झाली पाहिजे जेणेकरून महाराष्ट्राची कोणी बदनामी करणार नाही, अशी माझी भूमीका आहे, असे सरनाईक यांनी सांगितले.