मॅकॉन : अध्यक्षपदाच्या निवडणुकीला जेमतेम दोन आठवडे राहिलेले असताना अमेरिकेचे माजी अध्यक्ष बराक ओबामा आता डेमोक्रॅटिक पक्षाचे उमेदवार ज्यो बायडेन यांच्यासाठी प्रचारात उतरणार आहेत. बायडेन यांच्या प्रचार मोहिमेने यासंदर्भात माहिती दिली आहे.
त्याचवेळी रिपब्लिकनचे उमेदवार आणि अध्यक्ष डोनाल्ड ट्रम्प यांनी मात्र ओबामा यांच्या प्रचाराने काही फरक पडणार नाही, असा दावा केला आहे.
बराक ओबामा यांच्या अध्यक्षपदाच्या दोन्ही कार्यकाळात ज्यो बायडेन (वय ७७) उपाध्यक्ष होते. ओबामा यांनी कमला हॅरिस आणि बायडेन यांच्यासाठी ऑनलाइन प्रचार केला आहे. परंतु ५९ वर्षाचे असणारे माजी अध्यक्ष प्रथमच प्रचारासाठी प्रत्यक्ष लोकांसमोर जात असल्याचे ही पहिलीच वेळ आहे. ओबामा यांचे वक्तृत्व प्रभावी असल्याने त्यांचे विचार ऐकण्यासाठी नागरिक गर्दी करतील, असा अंदाज डेमोक्रॅटिकच्या समर्थकांना आहे.
याबाबत काल बायडेन म्हणाले की, येत्या २१ ऑक्टोबरपासून माजी अध्यक्ष ओबामा हे डेमोक्रॅटिकच्या प्रचारासाठी फिलाडेल्फिया आणि पेन्सिलव्हेनियाचा दौरा करणार आहेत. एका सर्वेक्षणानुसार डेमोक्रॅटिक पक्षाचे उमेदवार बायडेन यांना भारत-अमेरिकी समुदायाचा चांगला पाठिंबा मिळत आहे. त्याचवेळी भारतीय वंशांच्या उमेदवार कमला हॅरिस यांच्या उमेदवारीने भारतीय वंशांच्या नागरिकांत उत्साह असल्याचे म्हटले आहे.
येत्या ३ नोव्हेंबर रोजी मतदान होणार आहे. काल प्रसिद्ध केलेल्या सर्वेक्षणात म्हटले की, नोंदणीकृत भारत-अमेरिकी मतदारांपैकी ७२ टक्के मतदारांनी बायडेन आणि हॅरिस यांना झुकते माप दिले आहे. त्याचवेळी ट्रम्प यांना केवळ २२ टक्के मते मिळत आहेत.
बराक ओबामा प्रभावशाली प्रचारक नाहीत. एका अर्थाने ते प्रचारात उतरणार ही बातमी माझ्यासाठी चांगली आहे. कारण त्यांनी चांगले काम न केल्यानेच २०१६ मध्ये निवडून आलो.
डोनाल्ड ट्रम्प, अध्यक्ष
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.