धनुष्य बाणवाल्यांचा बाणा...राज्यपालांसमोर पिळतात मिशा आणि जनपथसमोर उठाबशा !  - Atul Bhatkhalkar's attack on Uddhav Thackeray who criticized the Governor | Politics Marathi News - Sarkarnama

धनुष्य बाणवाल्यांचा बाणा...राज्यपालांसमोर पिळतात मिशा आणि जनपथसमोर उठाबशा ! 

सरकारनामा ब्यूरो 
मंगळवार, 13 ऑक्टोबर 2020

मुख्यमंत्र्यांना हिंदुत्वासाठी कोणाच्या प्रमाणपत्राची गरज नसली तरी त्यांनी किमान हिंदुहृदयसम्राट (स्व.) बाळासाहेब ठाकरे यांचे हिंदुत्व तरी पाळावे अशी अपेक्षा आहे.

मुंबई : "धनुष्य बाणवाल्यांचा बाणा...राज्यपालांसमोर पिळतात मिशा आणि जनपथसमोर उठाबशा...दार उघड भावा, दार उघड...' अशा शब्दांत भारतीय जनता पक्षाचे आमदार अतुल भातखळकर यांनी मुख्यमंत्री उद्धव ठाकरे यांच्यावर हल्लाबोल केला आहे. 

राज्यातील मंदिरे उघडण्यावरून आज (ता. 13 ऑक्‍टोबर) राज्यपाल भगतसिंह कोश्‍यारी यांनी मुख्यमंत्री उद्धव ठाकरे यांना पत्र लिहित त्यांना हिंदुत्वाची आठवण करून दिली होती. त्याला उत्तर देताना ठाकरे यांनी हिंदुत्वासाठी मला तुमच्या प्रमाणपत्राची गरज नाही, असे म्हटले होते. त्यानंतर राज्यातील भाजप नेत्यांनी ठाकरे यांच्यावर चोहोबाजूंनी टीकास्त्र सोडले आहे. 

मुख्यमंत्र्यांना हिंदुत्वासाठी कोणाच्या प्रमाणपत्राची गरज नसली तरी त्यांनी किमान हिंदुहृदयसम्राट (स्व.) बाळासाहेब ठाकरे यांचे हिंदुत्व तरी पाळावे अशी अपेक्षा आहे. सणासुदीच्या दिवसात मंदिरं उघडा किंवा बार रेस्टॉरंट तरी बंद करा, असा टोला भातखळकर यांनी मुख्यमंत्री उद्धव ठाकरे यांना लगावला. 

नवरात्र-दसरा-दिवाळी या सणासुदीच्या दिवसांत मंदिरं उघडली नाहीत, तर तुम्हाला जनतेच्या रोषाला सामोरे जावे लागेल, असाही इशारा त्यांनी दिला आहे. भातखळकर यांनी या संदर्भात एक व्हिडिओ समाज माध्यमांवर पोस्ट केला आहे. 

मुख्यमंत्र्यांनी किमान हिंदुहृदयसम्राट (स्व.) बाळासाहेब ठाकरे यांचे हिंदुत्व तरी विसरू नये, त्यांचे हिंदुत्व तरी पाळावे. आज बाळासाहेब ठाकरे असते तर त्यांनी बार उघडण्यापूर्वी शंभर टक्के मंदिरं खुली केली असती. सणासुदीचे दिवस येत असताना तरी हिंदूंच्या भावना लक्षात घेऊन मंदिरं लवकरच उघडावी, असे आवाहनही भातखळकर यांनी केले आहे. 

मंदिरं उघडायची नसतील तर यापूर्वी खुले केलेले बार व रेस्टोरंट बंद करा. केवळ मंदिरांमुळे कोरोना वाढतोय, अशा खोट्या भूलथापा देणे बंद करा. कारण मंदिरं बंद असतानाही इतके दिवस महाराष्ट्र ही देशातील कोरोनाची राजधानी तुम्ही करून दाखवली होती. त्यामुळे हिंदुहृदयसम्राट बाळासाहेब ठाकरे यांचे हिंदुत्व पाळून मंदिरे त्वरेने खुली करा; अन्यथा जनतेच्या रोषाला सामोरे जाण्याची वेळ तुमच्यावर येईल, असा इशाराही त्यांनी दिला आहे. 

Edited By Vijay Dudhale

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख