कोल्हापूर : भाजपचे अध्यक्ष असलेली पश्चिम महाराष्ट्र देवस्थान समिती बरखास्त करण्याचे आदेश गुरुवारी राज्य शासनाने काढले. या समितीवर प्रशासक म्हणून जिल्हाधिकारी दौलत देसाई यांची नियुक्ती करण्यात आली आहे. शासनाच्या या आदेशामुळे समितीचे अध्यक्ष व भाजपचे महेश जाधव यांच्यासह सहा सदस्यांचा कार्यकाळ संपुष्टात आला आहे.
कोल्हापुरसह सांगली व सिंधुदुर्ग या तीन जिल्ह्यातील सुमारे तीन हजार 42 मंदिरांचा महसुलासह त्यावरील नियंत्रणाची जबाबदारी या समितीकडे होती. 2010 ते 2017 या काळात समितीला अध्यक्षच नव्हते, निवडच न झाल्याने या पदाचा कार्यभार जिल्हाधिकाऱ्यांकडे होता. राज्यात 2014 मध्ये भाजप शिवसेना युतीचे सरकार आल्यानंतरही पहिली तीन वर्षे या समितीला अध्यक्ष व सदस्यच नव्हते.
राज्य शासनाने समितीच्या अध्यक्षपदी 16 ऑगस्ट 2017 रोजी महेश जाधव यांची तर कोषाध्यक्ष म्हणून वैशाली क्षीरसागर व सदस्य म्हणून शिवाजी जाधव, राजाराम गरूड, राजेंद्र जाधव, चारूदत्त देसाई यांची नियुक्ती केली होती. गेली चार वर्षे या समितीमार्फत कामकाज सुरू होते.
राज्यात 2019 मध्ये शिवसेना, राष्ट्रवादी व कॉंग्रेस यांचे मिळून महाविकास आघाडीचे सरकार स्थापन झाले. त्यानंतर गेल्या दीड वर्षात सरकारने भाजपचे अध्यक्ष व सदस्य असलेल्या राज्यस्तरीय समित्या व महामंडळे बरखास्त करून तेथे तीन पक्षांच्या कार्यकर्त्यांची वर्णी लावण्याची तयारी सुरू केली आहे. मात्र, पश्चिम महाराष्ट्र देवस्थान समितीवर भाजपनियुक्त अध्यक्ष व सदस्यच कार्यरत होते.
त्यामुळे गुरुवारी राज्य शासनाने अध्यक्षांसह समितीचा कार्यकाल संपुष्टात आणून जिल्हाधिकारी यांच्याकडे अध्यक्षपदाचा कार्यभार देत भाजपचे प्रदेशाध्यक्ष चंद्रकांत पाटील यांनाच धक्का दिल्याचे बोलले जाते.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.