गोपीचंद पडळकर समर्थकांचे २४ तासांत उत्तर - Gopichand Padalkar supporters attack NCP office in Solapur | Politics Marathi News - Sarkarnama

ब्रेकिंग न्यूज

मुख्यमंत्री उद्धव ठाकरे कोल्हापुरात दाखल..पुरग्रस्त भागाची पाहणी
पुणेकरांना खुशखबर : पुणे मेट्रोची शुक्रवारी सकाळी ७ वाजता ट्रायल रन...पालकमंत्री अजित पवार यांच्या उपस्थितीत कोथरुड डेपो ते आयडीयल कॉलनीदरम्यान ट्रायल

गोपीचंद पडळकर समर्थकांचे २४ तासांत उत्तर

सरकारनामा ब्यूरो
गुरुवार, 1 जुलै 2021

त्यानंतर त्यांनी कार्यालयावर दगड फेकून पडळकर यांच्या समर्थनाच्या घोषणाही दिल्या.

सोलापूर : भारतीय जनता पक्षाचे विधान परिषद सदस्य गोपीचंद पडळकर यांच्या गाडीवर बुधवारी (ता. ३० जून) सायंकाळी सोलापुरातील मड्डी वस्ती परिसरात हल्ला झाला होता. हल्ल्यानंतर माध्यमांशी बोलताना पडळकर यांनी या हल्ल्यामागे राष्ट्रवादी काँग्रेस पक्षाचा हात असल्याचा आरोप केला होता. त्यानंतर आज (ता. १ जुलै) पडळकर समर्थकांनी सोलापुरातील राष्ट्रवादी काँग्रेसच्या कार्यालयावर हल्ला केला. (Gopichand Padalkar supporters attack NCP office in Solapur)

पडळकर हे घोंगडी बैठकांच्या निमित्ताने सोलापूर जिल्ह्यात आहेत. बुधवारी सायंकाळी मड्डी वस्ती परिसरातील बैठक संपवून जात असताना त्यांच्या गाडीवर अज्ञात तरुणाने दगड फेकला. तत्पूर्वी काल सकाळी झालेल्या पत्रकार परिषदेत पडळकर यांनी शरद पवार यांना आपण मोठा नेता मानत नाही. राष्ट्रवादी ही साडेतीन जिल्ह्यापुरती मर्यादीत आहे, अशी टीका केली होती. तसेच पवारांवर खालच्या पातळीवर टीका केली होती. हल्ल्यानंतर माध्यमांशी बोलताना पडळकर यांनी राष्ट्रवादीकडेच अंगुलीनिर्देश केले होते.

हेही वाचा : पडळकरांना जाब विचारता; मग गायकवाडांना मोकळे का सोडता!

हेही वाचा : पडळकर मनोरुग्ण असून, ही पीडा भाजपला मातीत घालणार; शिवसेनेचीही वादात उडी

हेही वाचा : आमदार गोपीचंद पडळकर यांच्यावर गुन्हा दाखल

दरम्यान, पडळकरांवरील हल्यानंतर आज त्यांच्या समर्थकांनी सोलापुरातील राष्ट्रवादी काँग्रेस पक्षाच्या कार्यालयावर हल्ला केला. दोन तरुणांनी दगडाच्या साहाय्याने खिडकीची काच फोडण्याचा प्रयत्न केला. त्यानंतर त्यांनी कार्यालयावर दगड फेकून पडळकर यांच्या समर्थनाच्या घोषणाही दिल्या. राष्ट्रवादीच्या कार्यालयावर हल्ला करणाऱ्या दोन तरुणांची नावे शरणू हांडे आणि सोमनाथ घोडके अशी आहेत. ते दोघेही स्वतःहून पोलिस ठाण्यात दाखल झाले आहेत.

दरम्यान, गोपीचंद पडळकर यांच्या गाडीवर दगड टाकण्याच्या घटनेच्या निषेधार्थ आम्ही राष्ट्रवादीच्या कार्यालयावर हल्ला केला. आम्ही पळून न जाता पोलिस ठाण्यात जात आहोत, असेही त्यांनी सांगितले आहे. पडळकर यांच्या गाडीवर दगड टाकणाऱ्या पोलिसांनी अजूनही अटक केलेली नाही, म्हणून राष्ट्रवादीच्या कार्यालयावर हल्ला करून आम्ही निषेध नोंदविला आहे, असेही ते म्हणाले.
 
अमोल मिटकरींचा पडळकरांवर आरोप

विधान परिषद सदस्य गोपीचंद पडळकर यांच्या गाडीवर बुधवारी (ता. ३० जून) सोलापुरात जो हल्ला झाला आहे, तो भारतीय जनता पक्षाने ठरवून केलेला स्टंट आहे. पत्रकारांशी बोलताना आज (ता. १ जुलै) आमदार पडळकर म्हणाले की हा हल्ला उपेक्षित, दलित, शोषित आणि वंचित वर्गाचा आवाज दाबण्यासाठी हल्ला केला आहे. हा उपेक्षित वर्ग ४० ते ५० लाख रुपयांच्या गाड्या घेऊन फिरत नसतो.

ही प्रतिक्रिया भारतीय जनता पक्षाकडूनच आलेली आहे. तो एक पब्लिसिटी स्टंट आहे. हा जो दगडहल्ला झाला, त्यामुळे आपल्याला झेड किंवा वाय प्लस सुरक्षा भेटेल. यासाठी गोपीचंद पडळकर यांनी केलेले हे सुनियोजित कटकारस्थान आहे. राज्यातील जनतेला हा सर्व प्रकार माहीत आहे, असा आरोप राष्ट्रवादी काँग्रेसचे आमदार अमोल मिटकरी यांनी पडळकर यांच्यावर हल्याप्रकरणी केला आहे. 

आमदार मिटकरी म्हणाले की, आज जागतिक कृषी दिन आहे. त्यानिमित्ताने गोपीचंद पडळकर यांना माझे सांगणे आहे की, शेतकऱ्यांसाठी बांधावर जाण्याचा जरा प्रामाणिक प्रयत्न करा. माजी मुख्यमंत्री वसंतराव नाईक यांनी महाराष्ट्रासाठी जे देणं दिलं आहे, त्याचा प्रचार करा.

माणमाणसांमध्ये भांडणे लावून तुमची आरएसएसची मानसिक विकृती जगासमोर आणू नका. अन्यथा भारतीय जनता पक्षाला तोंड काळं करावे लागेल. त्यामुळे भारतीय जनता पक्षानेसुद्धा अशा लोकांपासून सावध असावे, असा सल्लाही आमदार मिटकरी यांना भाजपला दिला आहे.

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख