पंढरपूर : धनगर समाजाचा ओबीसी प्रवर्गामध्ये समावेश करून आदिवासी समाजाच्या सवलती तातडीने लागू कराव्यात, अशी मागणी करत ओबीसी समाजाच्या वाट्यात कुणी वाटा मागत असेल तर ती भूमिका चुकीची आहे, असे मत भाजप प्रवक्ते आमदार गोपीचंद पडळकर यांनी व्यक्त केलं आहे.
धनगर समाज आरक्षणबाबत शुक्रवारी (ता.25) पंढरपुरात ढोल बजाव, सरकार जगावो आंदोलन करण्यात येणार आहे. आंदोलना संदर्भात आमदार पडळकर यांनी पंढरपुरात पत्रकार परिषदेत ही माहिती दिली. मागील अनेक वर्षापासून धनगर समाजाच्या आरक्षणाचा प्रश्न प्रलंबित आहे.
देवेंद्र फडणवीस सरकारने धनगर समाजाच्या विकासासाठी 1 हजार कोटी रूपये दिले होते. ते पैसे आघाडी सरकारने रद्द केले आहेत. त्यामुळे या सरकारला आरक्षण देण्याची सुबुध्दी द्यावी असे साकडे विठ्ठलाला घालणार आहे.
विठ्ठल हा वंचित आणि बहुजनाचे दैवत आहे. पांडुरंगापुढे ढोल वाजवून सरकाला जागं करण्यात येणार आहे. राष्ट्रवादी काँग्रेसचे अध्यक्ष शरद पवार शेतकऱ्याचे कैवारी म्हणून घेतात आणि संसदेत गैरहजर राहतात. तर दुसरीकडे आंदोलन करतात. त्यांची दुटप्पी भूमिका आता लोकांना समजली आहे.
आघाडी सरकारने मराठा समाजाची दिशाभूल केली आहे. देवेंद्र फडणवीसांनी दिलेले आरक्षण या सरकारला टिकवता आले नाही, असा आरोप करत ओबीसीच्या वाट्यात कुणी आता वाटा मागू नये, असा सूचक इशारा ही आमदार पडळकर यांनी दिला.
मराठा आरक्षणाला सर्वोच्च न्यायालयाकडून स्थगिती देण्यात आल्यामुळे मराठा बांधवांकडून आंदोलन सुरू करण्यात आले आहे. तत्कालीन मुख्यमंत्री पृथ्वीराज चव्हाण यांच्या काळात मराठा समाजाला १६ टक्के आरक्षण देण्यात आले होते.
मुंबई उच्च न्यायालयाकडून त्याला अवैध ठरविण्यात आले. नंतर सत्तेत आलेल्या फडणवीस सरकारच्या काळात न्या. गायकवाड यांच्या अहवालाच्या आधारे मराठा समाजाला शिक्षणात १२ तर नोकरीत १३ टक्के आरक्षण देण्यात आले. यालाही आव्हान देण्यात आले. मुंबई उच्च न्यायालयाने स्थगिती न दिल्याने याला सर्वोच्च न्यायालयात आव्हान देण्यात आले.
सर्वोच्च न्यायालयाने याला स्थगिती देत प्रकरण वरिष्ठ पीठाकडे वर्ग केले. त्यामुळे आता यावर पाच न्यायाधीशांच्या पीठात सुनावणी होणार आहे. तोपर्यंत मराठा समाजाला आरक्षण राहणार नाही. इकडे आरक्षणासाठी मराठा वर्गाकडून आंदोलन करण्यात येत आहे. यामुळे सरकारची अडचण होत आहे. सरकार आरक्षणासाठी सकारात्मक असल्याचे सांगण्यात येत आहे.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.