बारा आमदार अन् विकास महामंडळाचा काय संबंध...अजितदादांना राणेंचा सवाल...
मुंबई : "विदर्भ आणि मराठवाड्याच्या हिश्शाचा एकही रुपया कमी न करता निधीचे संपूर्ण वाटप करण्यात येईल. वैधानिक विकास महामंडळ अस्तित्वात असल्याचं गृहित धरुन निधी वाटपाच्या सूत्रानुसार अर्थसंकल्पात विदर्भ, मराठवाड्याला संपूर्ण निधी दिला जाईल. विदर्भ, मराठवाड्याच्या सर्वंकष विकासासाठी राज्य सरकार कटीबद्ध आहे. विदर्भ व मराठवाडा वैधानिक विकास महामंडळावरील नियुक्त्या लवकरच करण्यात येतील," अशी घोषणा उपमुख्यमंत्री अजित पवार यांनी काल विधानसभेत केली होती.
यावरून विरोधकांनी टीकेची झोड उठविली होती. विरोधीपक्षनेते देवेंद्र फडणीस, भाजपचे नेते सुधीर मुनगंटीवार यांनी यावर आक्रमक पवित्रा घेतला होता. भाजपचे नेते निलेश राणे यांनी आज अजित पवार यांच्या विधानावर टीका केली आहे. याबाबत त्यांनी टि्वट केलं आहे.
आपल्या टि्वटमध्ये निलेश राणे म्हणतात, "१२ आमदार जाहीर होतील, तेव्हा वैधानिक विकास महामंडळाची पुनर्स्थापना करू असं काल अजित पवार म्हणाले. मराठवाडा विदर्भातील जनतेचा हा अपमान आहे. अजित पवार मराठवाडा विदर्भात आले तर त्यांचं स्वागत त्यांच्या ताफ्यावर दगडी मारून केला पाहिजे. १२ आमदार आणि विकास महामंडळाचा काय संबंध.."
विधान परिषदेतील बारा आमदारांची राज्यपालांकडून नियुक्ती जाहीर होणेही तितकंच महत्वाचे आहे, असे सांगून या मुद्याकडेही अजित पवारांनी काल सभागृहाचे लक्ष वेधले. विधानसभेत उपस्थित एका चर्चेला उत्तर देताना उपमुख्यमंत्री अजित पवार यांनी कोकण आणि उत्तर महाराष्ट्रासाठी स्वतंत्र वैधानिक विकास मंडळांच्या निर्मितीसाठी राज्याने केंद्र सरकारकडे प्रस्ताव पाठवले असल्याची माहिती दिली.
विदर्भ, मराठवाडा, कोकण, उत्तर महाराष्ट्रासह संपूर्ण महाराष्ट्राचा विकास हे राज्य सरकारचे ध्येय आहे. त्यासाठी विधान परिषदेसाठी राज्य सरकारने शिफारस केलेल्या सदस्यांच्या नियुक्त्याही तातडीने होणे आवश्यक आहे. विधान परिषदेतील बारा आमदारांच्या नियुक्तीची घोषणाही तातडीने होणे आवश्यक असल्याचे मत त्यांनी व्यक्त केले.
अजित पवार म्हणाले, "हे वैधानिक विकास महामंडळ झालं पाहिजे, ही आमची भूमिका आहे. पण मंत्रिमंडळाने एक निर्णय घेतला आहे की ज्या दिवशी राज्यपाल १२ आमदारांची नावं जाहीर करतील त्या दिवशी किंवा दुसऱ्या दिवशी आम्ही वैधनिक विकास मंडळ घोषित करु. १० नंबरी काय आणि पुढचा कोणता नंबर लावा तसं अधिवेशन करु,”
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.