सावित्रीबाईंचे स्त्री शिक्षणासाठी केलेलं कार्य सदैव स्मरणात...  - Greetings from Ajit Pawar, Dhananjay Munde to Savitribai Phule  | Politics Marathi News - Sarkarnama

सावित्रीबाईंचे स्त्री शिक्षणासाठी केलेलं कार्य सदैव स्मरणात... 

सरकारनामा ब्युरो
रविवार, 3 जानेवारी 2021

क्रांतीज्योती सावित्रीबाई देशातील स्त्रीशिक्षणाच्या जननी आहेत.

मुंबई : “क्रांतीज्योती सावित्रीबाई फुले यांनी दिलेला सत्यशोधक विचार आणि रचलेल्या स्त्री शिक्षणाच्या पायावरच आजचा प्रगत, पुरोगामी, समर्थ भारत उभा आहे. देशातील स्त्रीशक्ती आज सर्व क्षेत्रात पुरुषांच्या खांद्याला खांदा लावून योगदान देत आहे. स्वातंत्र्याचा अनुभव घेत आहे, याचं श्रेय क्रांतिज्योती सावित्रीबाईंनी त्याकाळात स्री शिक्षणासाठी घेतलेले कष्ट व सहन केलेल्या हालअपेष्टांना आहे. देश व देशातील स्त्रीशक्ती क्रांतीज्योती सावित्रीबाईंच्या कार्याबद्दल कृतज्ञ आहे”, अशा शब्दात उपमुख्यमंत्री अजित पवार यांनी क्रांतिज्योती सावित्रीबाई फुले यांच्या जयंतीनिमित्त त्यांना आदरांजली वाहिली. 

सावित्रीबाई फुले यांच्या जयंतीनिमित्त अभिवादन करताना अजित पवार म्हणाले, ''क्रांतीसूर्य महात्मा ज्योतिबा फुले यांना त्यांच्या प्रत्येक कार्यात सावित्रीबाईंची समर्थ साथ लाभली. देशात स्त्रीयांची पहिली शाळा महात्मा फुले यांनी सुरु केली आणि त्या शाळेत पहिली स्त्री शिक्षिका होण्याची जबाबदारी सावित्रीबाईंनी सांभाळली. स्त्रियांच्या शिक्षणासाठी या दोघांनी केलेलं कार्य व घेतलेले कष्ट सदैव स्मरणात राहतील. क्रांतीज्योती सावित्रीबाई खऱ्या अर्थानं देशातील स्त्रीशिक्षणाच्या जननी आहेत.

सावित्रीबाईंनी महिलांच्या सक्षमीकरसाठी काम केलं. महिलांवरील अन्यायाविरुद्ध लढा दिला. त्या सत्यशोधक विचारांच्या क्रांतिकारी समाजसुधारक होत्या. त्यांचे कार्य आणि विचार पुढे नेण्यासाठी राज्य शासनातर्फे त्यांचा जन्मदिन ‘महिला शिक्षण दिन’ म्हणून विविध उपक्रमांद्वारे साजरा करण्यात येत आहे.''  उपमुख्यमंत्र्यांनी राज्यातील जनतेला ‘महिला शिक्षण दिना’च्या शुभेच्छा दिल्या आहेत.

फुले वाड्याचा विकास करणार : धनंजय मुंडे

पुणे : सावित्रीबाई फुले यांच्या जयंतीनिमित्त अभिवादन करण्यासाठी राज्याचे सामाजिक न्यायमंत्री धनंजय मुंडे हे महात्मा फुले वाड्यात आले होते, यावेळी त्यांनी सावित्रीबाई फुले आणि जोतिबा फुले यांना पुष्पहार अर्पण करून अभिवादन केलं. महाविकास आघाडी सरकारने सावित्रीबाई फुलेंचा जन्मदिवस हा शिक्षक दिन म्हणून साजरा करण्याचा ऐतिहासिक निर्णय घेतला, सभागृहात ही मागणी मी केलेली होती, त्या शिक्षक दिनाची सुरुवात नायगाव या ठिकाणाहून होत आहे, प्रत्येक जिल्ह्याच्या ठिकाणी पालकमंत्री शिक्षक दिन साजरा करीत आहेत. हा निर्णय ऐतिहासिक असल्याचं मुंडे यांनी सांगितलं महात्मा फुले वाड्याचा विकास छगन भुजबळ यांच्या नेतृत्वाखाली झाला, पुढच्या काळात तो आणखी व्हावा, अशी अनुयायांची ईच्छा आहे, तो विकास पुढच्या काळात होईल, असे मुंडे यांनी सांगितले. 

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख