शेतकऱ्यांच्या आंदोलनाबाबत शिवसेनेचे ढोंग..संजय निरूपमांचा टोला

मुंबई : दिल्लीतील शेतकरी आंदोलनाला पाठिंबा देण्यासाठी मुंबईत राजभवनावर नुकत्याच काढण्यात आलेल्या मोर्चात मुख्यमंत्री उद्धव ठाकरे हे सहभागी झाले नव्हते, तर शिवसेनेचे खासदार संजय राऊत यांनी मंगळवारी दिल्लीत शेतकरी आंदोलनात सहभाग घेऊन आंदोलनाला पाठिंबा दिला. यावर काँग्रेसचे नेते संजय निरूपम यांनी शिवसेनेवर टीका केली आहे. याबाबत त्यांनी टि्वट करीत शिवसेनेवर हल्लाबोल केला आहे. 

संजय निरूपम म्हणाले की कृषी कायदाला शिवसेनेने लोकसभेत विरोध केला होता. तर राज्यसभेत या कायद्याच्या विरोधात मतदान करण्यासाठी पळून गेले होते. जेव्हा मुंबईमध्ये या शेतकरी आंदोलनात सहभागी होण्यासाठी सुरवातीला सकारात्मक दाखविली. नंतर ऐनवेळी या आंदोलनापासून शिवसेना दूर राहिली. त्यांचे नेते दिल्लीत आंदोलनात सहभागी होण्यासाठी गेले. हे त्यांचे ढोंग आहे.  
 

शिवसेनेचे खासदार संजय राऊत यांनी मंगळवारी दुपारी दिल्ली-उत्तरप्रदेश सीमेवर शेतकरी आंदोलकांची भेट घेतली. शेतकरी नेते राकेश टिकैत यांची भेट घेत राऊत यांनी आंदोलनाला पाठिंबा दिला. त्यानंतर त्यांनी  'गाझीपूर बॉर्डर, म्हारो टिकैत' असा मजकूर व दोघे हात उंचावत असलेले छायाचित्र ट्विट केले आहे. 

केंद्र सरकारच्या कृषी कायद्यांना शिवसेनेने लोकसभेत पाठिंबा दिला होता. तर राज्यसभेत विरोध केला होता. काही दिवसांपूर्वी शेतकऱ्यांनी मुंबईत मोर्चा काढला होता. महाविकास आघाडीचे नेते या मोर्चाला उपस्थित होते. या मोर्चाला मुख्यमंत्री उद्धव ठाकरे उपस्थित राहणार असल्याचे सांगण्यात आले होते. तसेच पर्यावरण मंत्री आदित्य ठाकरेही या मोर्चाला उपस्थित राहणार असल्याचे सांगण्यात आले होते. मात्र, हे दोघेही या मोर्चाला उपस्थित राहिले नाहीत. त्यामुळे शिवसेनेच्या भूमिकेबाबत संदिग्धता निर्माण झाली होती. 

मंगळवारी राऊत यांनी शिवसेनेचे खासदार आंदोलकांना भेटणार असल्याची माहिती दिली होती. त्यानुसार राऊत यांच्यासह शिवसेनेचे अन्य खासदार राकेश टिकैत यांना भेटले. या भेटीमध्ये त्यांनी शेतकरी आंदोलनाला शिवेसनेचा पाठिंबा असल्याचे स्पष्ट केले. 

या भेटीनंतर माध्यमांशी बोलताना राऊत म्हणाले, 'टिकैत यांना भेटल्यानंतर आमचा पाठिंबा असल्याचे सांगितले. सरकारने शेतकऱ्यांशी योग्य मार्गाने चर्चा करायला हवी. देश चालविण्यासाठी अहंकार उपयोगी पडत नाही,' अशी टीका त्यांनी मोदी सरकारवर केली.