"आम्ही मागे लागून गोळ्या झाडल्यानंतर मुख्यमंत्री घरातून बाहेर पडणार : चंद्रकांत पाटील

सांगली  :  अतिवृष्टीची पाहणी करण्यासाठी मुख्यमंत्री उद्धव ठाकरे उद्यापासून राज्याच्या दैाऱ्यावर आहेत. सोलापूरपासून ते दैाऱ्याला सुरवात करणार आहेत. या पार्श्वभूमीवर भाजपचे प्रदेशाअध्यक्ष चंद्रकांत पाटील यांनी त्यांच्यावर निशाना साधला आहे. "आम्ही मागे लागून गोळ्या झाडल्यानंतर मुख्यमंत्री अखेर घरातून बाहेर पडणार आहेत," अशी टीका चंद्रकांत पाटील यांनी मुख्यमंत्र्यावर केली आहे. सांगली येथे पत्रकारांशी ते बोलत होते. 

राज्य सरकरने मदतीबाबत केंद्राकडे मागणी केली का ? राज्य सरकारने कागदावर नुकसानीचा तपशील नोंदवला आहे का?, असा प्रश्न चंद्रकांत पाटील यांनी उपस्थित केला आहे. यशोमती ठाकूर यांच्या राजीनाम्यासह अन्य मागाण्यांसाठी आगामी काळात आंदोलने करावी लागणार असल्याचेही त्यांनी सांगितले.

चंद्रकांत पाटील म्हणाले, "विरोधक आक्रमक झाले तर आपली आमदारकी धोक्यात येईल, अशी भीती सत्ताधारी पक्षातील काही आमदारांना वाटत आहे. त्यामुळे हे आमदार स्वत:च्या पक्षाच्या नेत्यांवर सरकारमधून बाहेर पडण्यासाठी दबाव आणत आहेत. अतिवृष्टीमुळे झालेल्या नुकसानभरपाईच्या मुद्द्यावरून राज्य सरकार आपली जबाबदारी झटकत आहे." 

राजू शेट्टीबाबत ते म्हणाले की  राजू शेट्टी यांना विधानपरिषदेचे वेध लागल्याने ते शांत बसले आहेत. एरवी शेतकऱ्यांच्या प्रश्नावर राजू शेट्टी आवाज उठवित असतात.  

हेही वाचा : आमदाराने पाठलाग करून पकडला अवैध गुटख्याचा ट्रक..
चाळीसगाव : मेहुणबारे (ता. चाळीसगाव) हद्दीत गुटखा असलेला ट्रक चाळीसगावचे आमदार मंगेश चव्हाण यांनी पकडला..पोलिसांकडे तक्रार केली. पण पोलिसांनी तक्रार घेतली नाही. यावरून बेकायदा व्यावसायिक आणि वरिष्ठ अधिकारीयांचे हितसंबध कसे आहेत, हे स्पष्ट होते.  या ट्रक वरील संपूर्ण अवैध गुटख्याची तपासणी करावी, संबंधित गुटखा मालक व्यक्तींवर चौकशी करून कारवाई करावी अशी मागणी आमदार चव्हाण यांनी केली आहे. चाळीसगावमधून गुटखा,गांजा राज्यात पुरविला जातो. पोलिसांचा आर्शीवाद अवैध व्यावसायिकांना असल्याने त्यांच्यावर कारवाई पोलिस करीत नाही, असा आरोप आमदार मंगेश चव्हाण यांनी केला आहे.  याबाबत पत्रकारांना माहिती देताना आमदार मंगेश चव्हाण म्हणाले की या प्रकरणी मी पोलिसांकडे तक्रार केली. पण माझी तक्रार पोलिसांनी घेतली नाही. याबाबत उच्च न्यायालयात मी दाद मागणार आहे. मेहुणबारे येथे स्थानिक गुन्हे शाखेच्या पथकाने सुमारे पन्नास लाखाचा गुटखा घेऊन जाणारा ट्रक (एमएच १८-एम ०५५३) पकडला. वरिष्टांच्या आदेशानुसार हा ट्रक जळगाव येथे आणत मी त्याचा पाठलाग करून हा ट्रक शिरसोली येथील जैन व्हॅली येथे पहाटे चार वाजता  पकडला. या ट्रक वरील संपूर्ण अवैध गुटख्याची तपासणी करावी, संबंधित गुटखा मालक व्यक्तींवर चौकशी करून कारवाई करावी.