मुंबई : कोरोनाची दुसरी लाट अद्याप पूर्ण ओसरलेली नसतानाच तिसऱ्या लाटेची आणि ‘डेल्टा प्लस’चा मोठ्या प्रमाणावर प्रसार होण्याची भीती लक्षात घेऊन राज्यात कडक निर्बंध लागू करण्यात आलेले आहेत. त्यामुळे राज्यातील 5 जिल्हा परिषद व त्यांतर्गतच्या 33 पंचायत समित्यांमधील रिक्त पदांच्या पोटनिवडणुकांची प्रक्रिया आज (ता. ९ जुलै) आहे त्या टप्प्यावर स्थगित करण्यात येत आहे, अशी घोषणा राज्याचे निवडणूक आयुक्त यू. पी. एस. मदान यांनी केली. (Zilla Parishad, Panchayat Samiti by-elections postponed: Election Commission announcement)
दरम्यान, ओबीसींचे राजकीय आरक्षण रद्द झाल्याने राज्यात मोठा राजकीय गदारोळ उठला होता. त्यातून या जिल्हा परिषद आणि पंचायत समित्यांच्या निवडणुका स्थगित करण्यात याव्यात, अशी मागणी विविध संघटनांकडून करण्यात येत होती. याशिवाय राज्य सरकारकडून या निवडणुका पुढे ढकलण्यात याव्यात, अशी मागणीचे पत्र राज्याच्या निवडणूक आयोगाला पाठविण्यात आले होते.
निवडणूक आयोगाने ह्या निवडणुका स्थगित करून राजकीय कोंडीत सापडलेल्या राज्य सरकारची एक प्रकारे सुटकाच केली आहे. कारण, ओबीसींच्या राजकीय आरक्षणासंदर्भात सर्वोच्च न्यायालयात लढण्यासाठी इम्पारिकल डाटा मिळविण्यासाठी सरकारला एक प्रकारे मुदतवाढ मिळल्याचे मानले जात आहे.
निवडणूक आयुक्त मदान यांनी याबाबत सांगितले की, धुळे, नंदुरबार, अकोला, वाशीम आणि नागपूर या 5 जिल्हा परिषदांमधील 70 निवडणूक विभाग आणि 33 पंचायत समित्यांच्या 130 गणांमधील पोटनिवडणुकांसाठी 19 जुलै 2021 रोजी मतदान होणार होते. पण, 7 जुलै 2021 रोजी राज्य सरकारने कोविड-19 च्या पार्श्वभूमीवर या पोटनिवडणुका स्थगित करण्याची विनंती राज्य निवडणूक आयोगाला केली होती.
सर्वोच्च न्यायालयाचे 6 जुलै 2021 रोजीचे आदेश आणि राज्य सरकारची विनंती लक्षात घेऊन राज्य निवडणूक आयोगाने राज्य सरकारकडून कोविड-19 बाबत अधिकची माहिती आणि जिल्हाधिकाऱ्यांकडून सविस्तर अहवाल मागविले होते. त्याआधारे आयोगाने या निवडणुका आज आहे त्या टप्प्यावर स्थगित केल्या आहेत. त्यामुळे या पोटनिवडणुकांसाठी लागू असलेली आचारसंहितादेखील आजपासून शिथिल करण्यात आली आहे. कोविड-19 ची परिस्थिती सुधारल्यावर या पोटनिवडणुकांचे उर्वरित टप्पे पार पाडण्यासंदर्भात राज्य निवडणूक आयोगातर्फे घोषणा करण्यात येईल, असेही मदान यांनी सांगितले.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.