वाढत्या कोरोनामुळे या पाच जिल्ह्यांनी राज्याची चिंता वाढवली

मुंबई : कोरोना रुग्णांची संख्या राज्यात सध्या कमी-जादा होताना दिसून येत आहे. एकीकडे, राज्यातील १६ जिल्हे कोरोनामुक्तीच्या दिशेने वाटचाल करीत आहेत, तर दुसरीकडे राज्यातील पाच जिल्ह्यांत अजूनही वाढत असलेल्या कोरोनाच्या संसर्गामुळे डोकेदुखी वाढत आहे. (Corona patients increased in five districts of the state)

राज्यात एकाच आठवड्यात कोरोनाचे ४५ हजार २० नवे रुग्ण सापडले आहेत. यात सर्वाधिक रुग्ण पुण्यात ९,०९४, नगरमध्ये ६,३८८, साताऱ्यात ६,०४६, सोलापूरमध्ये ५,६१८ आणि सांगलीमध्ये ४,८१० रुग्ण सापडल्याची नोंद आहे. राज्यातील इतर ३१ जिल्ह्यांमध्ये फक्त १३ हजार ०६४ नवीन रुग्ण सापडले आहेत, तर पाच जिल्ह्यांतच साडेएकतीस हजार रुग्ण आढळले आहेत. त्यामुळे या जिल्ह्यातील संसर्गाला अटकाव कसा करायचा, असा प्रश्न आता प्रशासनापुढे आहे. 

हेही वाचा : नाही... नाही...आम्ही आता वरुण सरदेसाईला सोडणार नाही

महाराष्ट्र आरोग्य विभागाने जाहीर केलेल्या साप्ताहिक अहवालानुसार सध्या नंदुरबार जिल्हा कोरोनामुक्त झाला आहे. याशिवाय १६ जिल्ह्यांत १०० पेक्षा कमी रुग्ण उपचाराधीन आहेत. सध्या राज्यात कोरोना पॉझिटिव्हिटीचा रेट २.४९ टक्के इतका आहे, तर सात जिल्ह्यांमध्ये कोरोना पॉझिटिव्हिटीचा दर त्याहून जास्त आहे. सध्या पुण्यात ५. ६२ टक्के, सांगली ४. ६६ टक्के, नगर ४. ६३ टक्के, सातारा ४. ४४ टक्के, उस्मानाबाद ३. ५८ टक्के, सिंधुदुर्ग ३. २४ टक्के, सोलापूर २.९० टक्के, रत्नागिरी २.६५ टक्के आणि नाशिकमध्ये २. ५९ टक्के पॉझिटिव्हिटी दर आहे.

हेही वाचा : लाचखोर सभापती लांडगेंचा जेलमधील मुक्काम वाढला; स्थायीचे १५ सदस्यही एसीबीच्या रडारवर

राज्यातील १६ जिल्ह्यांत कोरोनाचे १०० पेक्षा कमी रुग्ण आहेत. ते जिल्हे आणि रुग्णांची संख्या पुढीलप्रमाणे ः वर्धा - ४, गोंदिया- ४, यवतमाळ - ६, भंडारा- ६, वाशिम- १०, धुळे- १७, परभणी- २१, अकोला- २१, गडचिरोली - २५, नांदेड- ३४, बुलडाणा- ३४, जळगाव- ४१, हिंगोली- ६१, जालना- ८५, अमरावती- ९३, नागपूर- ९७  या जिल्ह्यांमध्ये कोरोनाचे रुग्ण शंभरपेक्षा कमी आढळून आलेले आहेत. पाच जिल्ह्यांनी मात्र राज्याच्या आरोग्य विभागाची चिंता वाढवली आहे.