खरा योद्धा : 85 वर्षांच्या आजोबांनी तरूणाला दिलं आपलं बेड अन् मृत्यूला कवटाळलं - Covid19 85 year old narayan dabhadkar gave his bed to other person | Politics Marathi News - Sarkarnama

खरा योद्धा : 85 वर्षांच्या आजोबांनी तरूणाला दिलं आपलं बेड अन् मृत्यूला कवटाळलं

वृत्तसंस्था
बुधवार, 28 एप्रिल 2021

नागपूरमधील नारायण भाऊराव दाभाडकर असे या 85 वर्षांच्या योद्धाचे नाव आहे.

नागपूर : कोरोनाचा संसर्ग वाढू लागल्याने देशातील सर्वच राज्यांमध्ये रुग्णांना बेड मिळवण्यासाठी मोठी कसरत करावी लागत आहे. बेड अभावी काहींचा रुग्णालयाबाहेरच मृत्यू झाल्याच्या घटना घडल्या आहेत. बेड मिळत नसल्याने अनेकच जण घरीच उपचार घेत असून गंभीर होत आहेत. अशा परिस्थितीत रुग्णालयात एखादा बेड मिळूनही तो दुसऱ्या रुग्णासाठी सोडून देणे, अशा घटना घडणे दुरापास्तच. पण नागपूरमध्ये हा त्याग एका 85 वर्षांच्या ज्येष्ठ नागरिकाने केला.

नागपूरमधील नारायण भाऊराव दाभाडकर असे या 85 वर्षांच्या योद्धाचे नाव आहे. त्यांना कोरोनाचा संसर्ग झाल्याने नागपूरमधील एका रुग्णालयात उपचार सुरू होते. त्यावेळी एक महिला आपल्या तरूण पतीसाठी रुग्णालयात बेड शोधण्यासाठी आली होती. त्यांना याबाबत माहिती मिळाल्यानंतर ते बेड देण्यास तयार झाले. "मी आता 85 वर्षांचा झालो आहे. आयुष्य पाहिले आहे. पण जर या महिलेच्या पतीचा मृत्यू झाला तर त्यांची मुलं अनाथ होतील. त्यामुळं त्या व्यक्तीचे प्राण वाचविणे हे माझे कर्तव्य आहे," असे म्हणत त्यांनी बेड सोडून दिला. 

दाभाडकर यांची अॅाक्सीजन पातळी 60 पर्यंत पोहचल्याने त्यांची मुलगी व जावयाने त्यांना इंदिरा गांधी रुग्णालयात दाखल केले होते. खूप प्रयत्नानंतर त्यांना हा बेड मिळाला होता. त्याचवेळी 40 वर्षांच्या आपल्या पतीसाठी महिला बेड शोधत होती. बेड नसल्याने ही महिला रडत असल्याचे दाभाडकर यांनी पाहिले होते. त्यानंतर त्यांनी बेड देण्याचा निर्णय घेतला. 

रुग्णालय प्रशासनाने दाभाडकर यांच्याकडून बेड देत असल्याचे लिहून घेतले. त्यानंतर दाभाडकर यांना घरी आणण्यात आले. घरी तीन दिवसानंतरच त्यांचे निधन झाले. मध्य प्रदेशचे मुख्यमंत्री शिवराज सिंह चौहान यांनी ट्विटरवर दाभाडकर यांच्या त्यागाचे कौतुक केले आहे. 

दाभाडकर हे आरएसएसचे कार्यकर्ते

नारायण दाभाडकर हे आरएसएसचे कार्यकर्ते असल्याचे मुख्यमंत्री चौहान यांनी म्हटले आहे. दुसऱ्या व्यक्तीचे प्राण वाचवत नारायणजी यांनी तीन दिवसांत जगाचा निरोप घेतला. समाज आणि राष्ट्राचे खरे सेवकच असा त्याक करू शकतात. आपल्या पवित्र सेवाभावाला प्रणाम. तुम्ही समाजासाठी प्रेरणास्त्रात आहेत, असे ट्विट चौहान यांनी केले आहे.

Edited By Rajanand More

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख