निवडणुकीत पॅनेलचा खर्च करायचा कुणी? गावपुढारी साशंक

सरपंच पदाचे अद्यापही आरक्षण जाहीर झालेले नसून निवडणूक झाल्यानंतर हे आरक्षण जाहीर होणार आहे. सरपंचपदाची 'लॉटरी' गुलदस्त्यात असल्याने निवडणुकीच्या पॅनेलचा खर्च कुणी करायचा, असा प्रश्‍न गावपुढाऱ्यांसमोर ठाकला आहे
Who will spend in Grampanchayat Election is Question before leaders
Who will spend in Grampanchayat Election is Question before leaders

राजापूर :  कोरोनाच्या महामारीमुळे लांबणीवर पडलेल्या ग्रामपंचायतींच्या निवडणुकीच्या रणधुमाळीला सुरवात झाली आहे. मात्र, सरपंच पदाचे अद्यापही आरक्षण जाहीर झालेले नसून निवडणूक झाल्यानंतर हे आरक्षण जाहीर होणार आहे. सरपंचपदाची 'लॉटरी' गुलदस्त्यात असल्याने निवडणुकीच्या पॅनेलचा खर्च कुणी करायचा, असा प्रश्‍न गावपुढाऱ्यांसमोर ठाकला आहे.

यापूर्वी ग्रामपंचायत निवडणुका जाहीर होण्यापूर्वी त्या ग्रामपंचायतीच्या सरपंचपदाचे आरक्षण जाहीर होत होते. त्यामुळे सरपंच पदासाठी इच्छुक असलेले उमेदवार सरपंचपदावर डोळा ठेवून पॅनेलच्या सर्व उमेदवारांच्या खर्चाचा भार उचलत असत. खर्चाचा भार उचलणाऱ्या उमेदवाराला पॅनेल निवडून आल्यानंतर आपसूकच सरपंचपदाचा बहुमान मिळत असे. सरपंचपदासाठी इच्छुक असलेल्या उमेदवारामुळे पॅनेलमधील अन्य उमेदवारांच्या खर्चाचा भारही हलका होत असे. या वेळी मात्र त्याच्या उलटे चित्र आहे. 

निवडणुकीच्या रणसंग्रामाला सुरवात झाली असली तरी अद्यापही सरपंचपदाचे आरक्षण जाहीर झालेले नाही. ग्रामपंचायत निवडणुकीनंतर म्हणजे १५ जानेवारीनंतर सरपंच पदाचे आरक्षण जाहीर होणार आहे. त्यामुळे सरपंच पदावर डोळा ठेवून निवडणुकीच्या आखाड्यात शड्डू ठोकण्यास इच्छुक असलेल्यांच्या गोटामध्ये 'थोडी खुशी, थोडा गम' अशी काहीशी स्थिती आहे. त्याचा काही अंशी फटका ग्रामपंचायत निवडणुकीच्या आखाड्यात शड्डू ठोकणाऱ्या एका पक्षाची विचारधारा असलेल्या उमेदवारांच्या पॅनेलला बसण्याची शक्‍यता आहे.

खर्चाची मर्यादा
ग्रामपंचायत सदस्य संख्या उमेदवारांच्या खर्चाची मर्यादा निवडणूक विभागाने घालून दिली आहे. सात ते नऊ सदस्यसंख्या असलेल्या ग्रामपंचायत उमेदवार, २५ हजार, ११ ते १३ सदस्यसंख्या असलेल्या ग्रामपंचायत उमेदवारासह ३५ हजार, पंधरा ते सतरा सदस्यसंख्या असलेल्या ग्रामपंचायत उमेदवारांना ५० हजार रुपये खर्च करण्याची मर्यादा निवडणूक विभागाने घालून दिली आहे.

उमेदवाराच्या खांद्यावर भार..
सरपंच पदासाठी इच्छुक असलेल्या उमेदवाराच्या खांद्यावर गावपुढारी अनेकवेळा पॅनेलच्या खर्चाचा भार टाकतात. मात्र, आरक्षणामुळे इच्छुक उमेदवार सद्यःस्थितीमध्ये तळ्यात-मळ्यात आहेत. अशा स्थितीमध्ये पॅनेलचा खर्च कोण करणार, असा प्रश्‍न अनेक पॅनेलसह गावपुढाऱ्यांपुढे आहे.
Edited By - Amit Golwalkar

Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुकट्विटरइन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.

Related Stories

No stories found.
Sarkarnama News
sarkarnama.esakal.com