सभापती पोखरकरांविरोधातील शिवसेना सदस्यांचे बंड यशस्वी : अविश्वास ११ विरूद्ध ३ मतांनी मंजूर 

राजगुरूनगर (जि. पुणे) : स्वपक्षातील सदस्यांनी राष्ट्रवादी काँग्रेसच्या मदतीने दाखल केलेला अविश्वास ठराव, त्यानंतर सदस्यांचा डोणजे येथील रिसॉर्टवर मुक्काम, तिथे जाऊन सभापती व शिवसेना समर्थकांनी केलेला राडा, त्यानंतर पोखरकरांना झालेली अटक; या नाट्यमय घडामोडीनंतर अखेर आज (ता. ३१ मे) खेड पंचायत समितीचे शिवसेनेचे सभापती भगवान पोखरकर यांच्यावरील अविश्वास ठराव ११ विरूद्ध ३ मतांनी मंजूर झाला. खेड तालुक्याच्या इतिहासात पहिल्यांदाच सभापतींवर अविश्वास ठराव मंजूर झाला आहे. (No-confidence motion passed against Khed's sabhapati Bhagwan Pokharkar)

सभापती पोखरकर यांच्या विरोधात २४ मे रोजी जिल्हाधिकाऱ्यांकडे अविश्वास ठराव दाखल करण्यात आला होता. त्या ठरावावर मतदान घेण्यासाठी आज सकाळी ११ वाजता पंचायत समिती सदस्यांची सभा बोलाविली होती. सभेस सर्व १४ पंचायत समिती सदस्य उपस्थित होते. अटक असतानादेखील सभापती पोखरकरांना न्यायालयाच्या आदेशानुसार मतदानासाठी आणण्यात आले होते. 

हेही वाचा : ओबीसी समाज सरकारला माफ करणार नाही : टिळेकरांचा आंदोलनाचा इशारा

सभा सुरू झाल्यानंतर सभापती पोखरकर, कॉंग्रेसचे सदस्य अमोल पवार, शिवसेनेचे बंडखोर सदस्य अंकुश राक्षे यांची भाषणे झाली. अविश्वास ठराव मंजूर करणे तालुक्याच्या इभ्रतीच्या दृष्टीने योग्य नाही. सभापती येथेच राजीनामा देतील, ठराव मागे घ्या, असा प्रस्ताव अमोल पवार यांनी मांडला. पोखरकरांनीही तशी विनंती केली, पण त्यांना अविश्वास ठरावावर सह्या केलेल्या ११ सदस्यांनी प्रतिसाद दिला नाही.

पीठासीन अधिकाऱ्यांनी ठराव मंजुरीसाठी मांडल्यानंतर ११ सदस्यांनी ठरावाच्या बाजूने हात वर करून पाठिंबा दिला. शिवसेनेचे सुभद्रा शिंदे, अमर कांबळे, वैशाली जाधव, सुनीता सांडभोर, अंकुश राक्षे, मच्छिंद्र गावडे, राष्ट्रवादी काँग्रेसचे अरुण चौधरी, मंदाबाई शिंदे, नंदा सुकाळे व वैशाली गव्हाणे आणि भाजपचे सदस्य उपसभापती चांगदेव शिवेकर यांनी ठरावाच्या बाजूने मतदान केले. तर शिवसेनेचे सभापती पोखरकर, ज्योती अरगडे आणि काँग्रेसचे अमोल पवार यांनी ठरावाच्या विरुद्ध मतदान केले. 

खेड तालुक्याच्या इतिहासातील हा काळा दिवस आहे. शिवसेनेच्या सुभद्रा शिंदे व मच्छिंद्र गावडे या दोन सदस्यांचे हात खाली होते. पण नंतर त्यांना बळजबरीने हात वर करण्यास सांगण्यात आले. अतिशय गलिच्छ आणि घाणेरडे राजकारण याठिकाणी केले जात आहे. त्यामुळे या प्रक्रियेविरोधात आम्ही उच्च न्यायालयात जाणार आहोत, असे काँग्रेसचे पंचायत समिती सदस्य अमोल पवार यांनी सांगितले.

खरेतर आपसात ठरल्याप्रमाणे पोखरकरांनंतर मला सभापती करण्याचे ठरलेले होते. पण, पंचायत समितीच्या इमारतीचे काम थांबविण्यासाठी हे खालच्या स्तरावरचे राजकारण केले गेले, असेही अमोल पवार म्हणाले.

ज्योती अरगडे यांना रडू कोसळले 

अविश्वास ठराव मंजूर झाल्यानंतर सभागृहाबाहेर आल्यावर शिवसेनेच्या सदस्या ज्योती अरगडे यांना रडू कोसळले. स्वर्गीय माजी आमदार सुरेश गोरे यांच्याशी त्यांनी निवडून आणलेल्या सदस्यांनीच इमान ठेवले नाही, असे त्या म्हणाल्या. आपले पती केशव अरगडे यांना विनाकारण या गुन्ह्यात गोवण्यात आल्याचा आरोपही त्यांनी केला. 

गरजेपेक्षा मोठा फौजफाटा 

या अविश्वास ठरावाच्या निमित्ताने महसूल व पोलिस अधिकाऱ्यांनी अतिशय आततायीपणा केला. गरजेपेक्षा खूपच मोठा फौजफाटा याठिकाणी आणून पंचायत समितीच्या परिसराला छावणीचे स्वरूप दिले होते. राज्य राखीव दल, शीघ्र कृती दल आणि दंगल नियंत्रण पथकाच्या तुकड्या याठिकाणी बंदोबस्तासाठी आणल्या गेल्या होत्या. पत्रकारांनाही वार्तांकनासाठी पंचायत समिती आवारात जाऊ दिले नाही.
 
मोहितेंना विरोध केल्यानेच अविश्वास आणला
पंचायत समितीच्या इमारतीचे काम थांबविण्यास मी आमदार दिलीप मोहिते यांना विरोध केला, म्हणून माझ्याविरुद्ध षडयंत्र रचून हा अविश्वास ठराव आणला गेला, असे सभापती पोखरकर यांनी सांगितले. ते अधिक बोलू इच्छित होते, पण त्यांना पोलिसांनी बोलू दिले नाही.