पीएचडी करणाऱ्या तरुणाची पुण्यात हत्या 

जालना : पुण्यातील पाषाण येथील राष्ट्रीय रसायन प्रयोगशाळा अर्थात एनसीएलमध्ये रसायन शास्त्रात पीएचडी करणाऱ्या जालना जिल्ह्यातील तरुणाची गळ्यावर तीक्ष्ण हत्याराने वार करून हत्या करण्यात आली आहे. ही हत्या केल्यानंतर त्याचा मृतदेह सुस खिंडीत फेकून देण्यात आला. 

सुदर्शन पंडित असं हत्या करण्यात आलेल्या तरुणाचं नाव आहे. तो जालना जिल्ह्यातील जानेफळ पंडित गावचा रहिवासी आहे. काल सकाळी सुस भागात फिरण्यासाठी गेलेल्या नागरीकांना त्याचा मृतदेह आढळला. त्यानंतर त्यांनी पोलिस नियंत्रण कक्षाला ही माहिती दिल्यानंतर पोलिस लगेच घटनास्थळी पोहचले. 

घटनास्थळी आढळलेल्या पाकिटात सुदर्शचे आधारकार्ड आढळून आले. त्यावरून त्याची ओळख पटली. सुदर्शन गेल्या दीड वर्षापूर्वी पीएचडी करण्यासाठी पुण्यात आला होता. दरम्यान ही हत्या का करण्यात आली याचं कारण अजून समजू शकलेलं नाही. या प्रकरणी चतुरशृंगी पोलीस ठाण्यात गुन्हा दाखल करण्यात आला आहे.  .

हेही वाचा : जिल्हा बँकेच्या ठरावावरून पानवणच्या सरपंचाच्या पतीचे अपहरण
 
म्हसवड/ सातारा : सातारा जिल्हा मध्यवर्ती सहकारी बँकेच्या निवडणुकीच्या ठरावावरून म्हसवड येथील पानवण गावातील डॉ.नाना शिंदे यांचे अपहरण झाल्याची धक्कादायक प्रकार घडला आहे. नाना शिंदे यांच्या पत्नी या गावच्या नवनिर्वाचित सरपंच आहेत. त्यामुळे या घटनेला राजकीय पार्श्वभूमी असल्याचा अंदाज व्यक्त केला जात आहे. म्हसवड तालुक्यातील पानवण गावात असणाऱ्या शेतात काल संध्याकाळी शेतीच्या कामानिमित्त गेलेले डॉ. नाना शिंदे रात्री उशीरापर्यंत परत आले नसल्याने घरच्या लोकांनी शोध शोध केली. यामध्ये शेतालगत असणाऱ्या रस्त्यावर त्यांची चारचाकी गाडी आढळली. त्या गाडीची तोडफोड झालेली होती. तसेच गाडीच्या मागील सीटवर ॲसिड सांडल्याचे निदर्शनास आले. परंतु डॉ. शिंदे यांचा शोध लागू शकला नाही. त्यामुळे म्हसवड पोलिस ठाण्यात अज्ञाता विरोधात अपहरणाचा गुन्हा दाखल झाला असून पोलिस अधिक तपास करत आहेत. जिल्हा बँकेच्या निवडणूकीवरून माण तालुक्यात राजकारण पेटले आहे.