अरूण लाड हे तर कारखानदार; पदवीधरांशी त्यांचा काय संबंध ? रूपाली पाटील यांचा टोला  

अरूण लाड हे कारखानदार आहेत. पदवीधरांशी त्यांचा संबंध काय ? पदवीधरांच्या कोणत्या प्रश्‍नावर त्यांनी आवाज उठविला आहे, असा प्रश्‍न अॅड. रूपाली पाटील-ठोंबरे यांनीकेला आहे.
लाड 18.jpg
लाड 18.jpg

पुणे : महाविकास आघाडीचे उमेदवार अरूण लाड हे आजोबांच्या वयाचे पदवीधर आहेत. ते कारखानदार आहेत. पदवीधरांशी त्यांचा संबंध काय ? पदवीधरांच्या कोणत्या प्रश्‍नावर त्यांनी आवाज उठविला आहे, असा प्रश्‍न महाराष्ट्र नवनिर्माण सेनेच्या पुणे पदवीधर मतदारसंघातील उमेदवार अॅड. रूपाली पाटील-ठोंबरे यांनी आज केला आहे.

स्वातंत्र्यानंतर पुणे पदवीधर मतदारसंघातून उमेदवारी मिळविणारी मी एकमेव महिला उमेदवार आहे. सुशिक्षित पदवीधर महिला म्हणून मी सातत्याने काम केले आहे. आधी काम केले मग उमेदवारी मागितली. पक्षाचे अध्यक्ष राज ठाकरे यांनी मला उमेदवारी दिली. या निवडणुकीच्या माध्यमातून पदवीधरांच्या प्रश्‍नावर काम करण्यासाठी मला महाराष्ट्र विधीमंडळात संधी मिळेल, असा विश्‍वास अॅड. पाटील-ठोंबरे यांनी व्यक्त केला. 

त्या म्हणाल्या, "अरूण लाड यांनी गेल्यावेळी बंडखोरी केली होती. त्यानंतर ते गेली सहा वर्षे गायब होते. या काळात त्यांनी पदवीधरांसाठी काय काम केले हे मायक्रोस्कोपखाली पाहावे लागेल. निवडणुका आल्यानंतर आता त्याच पक्षाने त्यांना उमेदवारी दिली आहे.''

अॅड, रूपाली पाटील म्हणाल्या, "आपल्या राजकीय व्यवस्थेत पदवीधरांचे प्रश्‍न गांभीर्याने कुणीच मांडत नाही. राज्यात शिक्षक भरती होत नाही. राज्य सरकारला यात लक्ष घालायला वेळ नाही. शिक्षक भरतीसह शिक्षकांचे अनेक प्रश्‍न प्रलंबित आहेत. 19 कोटी शिष्यवृत्तींचा गैरव्यवहार उघडकीस आला आहे. मात्र, संबंधित दोषींवर कारवाई होत नाही. भारतीय जनता पार्टीने गेली अनेक निवडणुकांत या मतदारसंघाचे नेतृत्व केले आहे. मात्र, त्यांच्याकडूनही पदवीधरांच्या प्रश्‍नांची सोडवणूक झालेली नाही. पदवीधरांचे प्रश्‍न सत्ताधाऱ्यांनी सोडविले नाहीत. प्रत्येकवेळी जाणीवर्पूक कानाडोळा करण्याची भूमिका सर्वच सत्ताधाऱ्यांनी घेतली आहे. या साऱ्या गोष्टींना वाचा फोडून पदवीधरांचा आवाज बुलंद करण्यासाठी मी या निवडणुकीच्या मैदानात उतरले आहे. '' 
 
पुणे जिल्हाधिकारी कार्यालयातील माहितीनुसार १२ नोव्हेंबरपर्यत पुणे पदवीधरमधील मतदारांची संख्या ही तीन लाख ६५ हजार ३५८ वरून चार लाख २६ हजार २४४ वर गेली आहे. त्यात एकट्या पुणे जिल्ह्याचा वाटा १ लाख ३६ हजार ६११ एवढा आहे. त्यानंतर कोल्हापूर व सांगलीचा नंबर लागतो. वाढलेल्या १९ इतर  मतदारांतही सर्वाधिक म्हणजे १४ हे पुणे जिल्ह्यातीलच आहेत. त्यामुळे पुणे पदवीधरच्या मागच्या मतदारयादीमध्ये मतदारसंख्येत तीनवर असलेला पुणे जिल्हा आता एक नंबरवर आला आहे. तर, मतदारसंघातील दोन्ही प्रमुख उमेदवार असलेला सांगली तिसऱ्या नंबरवर कायम राहिला आहे. मतदारसंघात जेवढ्या महिला मतदार आहेत, त्यापेक्षा अधिक मतदार हे पुणे जिल्ह्यात आहेत. एकूणच महिला मतदारांची संख्या पुरुषांच्या तुलनेत खूप कमी आहे. सोलापूर जिल्ह्यात सर्वात कमी मतदार आहेत. ती एकूण संख्या पुणे जिल्ह्यातील महिला मतदारांच्या थोडी अधिक आहे.
 

Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुकट्विटरइन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.

Related Stories

No stories found.
Sarkarnama News
sarkarnama.esakal.com