'त्या' नटीबाई कोणत्या बिळात लपल्यात : कंगनावर शिवसेनेचा पुन्हा वार - Shivsena Targets Kangana Ranaut Again | Politics Marathi News - Sarkarnama

'त्या' नटीबाई कोणत्या बिळात लपल्यात : कंगनावर शिवसेनेचा पुन्हा वार

सरकारनामा ब्युरो
सोमवार, 5 ऑक्टोबर 2020

कंगना राणावतने या प्रकरणात मुंबई पोलिसांवर टीका केली होती. मुंबईची तुलना तिने पाकिस्तान व्याप्त काश्मीरशी केल्याने शिवसेना संतापली होती. आता एम्सच्या अहवालाने शिवसेनेला पुन्हा ताकद दिली आहे. 'सामना' या आपल्या मुखपत्रातील अग्रलेखाद्वारे शिवसेनेने आपल्यावर टीका करणाऱ्यांना सुनावले आहे

पुणे : सुशांतच्या मृत्यूचे ज्यांनी भांडवल केले, मुंबईला पाकिस्तानची, बाबराची उपमा दिली त्या नटीबाई आता कोणत्या बिळात लपल्या आहेत? हाथरसमध्ये एका तरुण मुलीवर बलात्कार करून मारले, तेथील पोलिसांनी त्या मुलीचा देह विटंबना करून काळोखात जाळला याबद्दल त्या नटीने डोळ्यात ग्लिसरीन घालूनसुद्धा दोन अश्रू ढाळले नाहीत. ज्यांनी मागच्या शंभर दिवसांत महाराष्ट्राची, मुंबई पोलिसांची यथेच्छ बदनामी केली, अशा गुप्तेश्वरी नट्या आणि ‘गुप्तेश्वर’ आता कोणते प्रायश्चित्त घेणार आहेत? असा सवाल उपस्थित करत शिवसेनेने 'सामना' च्या माध्यमातून कंगना राणावत व बिहारचे माजी पोलिस महासंचालक गुप्तेश्वर पांडे यांच्यावर निशाणा साधला आहे. 

सुशांतसिंह राजपूतने आत्महत्याच केली असा निष्कर्ष एम्सच्या तज्ज्ञ डाॅक्टरांनी काढला आहे. सुशांतची आत्महत्या नसून तो खून असल्याचे काही माध्यमे सांगत होती. कंगना राणावतने या प्रकरणात मुंबई पोलिसांवर टीका केली होती. मुंबईची तुलना तिने पाकिस्तान व्याप्त काश्मीरशी केल्याने शिवसेना संतापली होती. आता एम्सच्या अहवालाने शिवसेनेला पुन्हा ताकद दिली आहे. 'सामना' या आपल्या मुखपत्रातील अग्रलेखाद्वारे शिवसेनेने आपल्यावर टीका करणाऱ्यांना सुनावले आहे. जे महाराष्ट्राच्या, मराठी माणसाच्या वाटेला गेले त्यांचे साफ वाटोळे होते. बेइमान, हरामखोरांनी हे आता तरी समजून घ्यावे, असे सांगत हाथरस बलात्कार प्रकरणात शेपूट घालून बसणाऱ्यांनी महाराष्ट्राच्या मर्दानगीची परीक्षा घेऊ नये! असा इशारा या अग्रलेखात देण्यात आला आहे. 

''एम्स' ने सुशांतप्रकरणी जो अहवाल दिला, तो अंध भक्त नाकारणार आहेत काय? सुशांत राजपूतच्या दुर्दैवी मृत्यूस 110 दिवस झाले. या काळात मुंबई पोलिसांची ज्यांनी यथेच्छ बदनामी केली, मुंबई पोलिसांच्या तपासावर ज्यांनी रोज प्रश्नचिन्ह निर्माण केले त्या राजकीय पुढाऱ्यांनी, कुत्र्यासारख्या भुंकणाऱ्या गलिच्छ वृत्तवाहिन्यांनी महाराष्ट्राची माफीच मागायला हवी. ज्यांनी मागच्या शंभर दिवसांत महाराष्ट्राची, मुंबई पोलिसांची यथेच्छ बदनामी केली, अशा गुप्तेश्वरी नट्या आणि 'गुप्तेश्वर' आता कोणते प्रायश्चित्त घेणार आहेत?,'' असा संतप्त सवाल या अग्रलेखातून विचारण्यात आला आहे. 

''अभिनेता सुशांतसिंह राजपूत याने गळफास घेऊन आत्महत्याच केली. त्याचा खून वगैरे झाला नाही असे सत्य पुराव्यासह ‘एम्स’चे डॉ. सुधीर गुप्ता यांनी समोर आणले आहे. डॉ. गुप्ता हे शिवसेनेच्या वैद्यकीय विभागाचे प्रमुख नाहीत. त्यांचा मुंबईशीही तसा संबंध दिसत नाही. डॉ. गुप्ता हे ‘एम्स’च्या फॉरेन्सिक विभागाचे प्रमुख आहेत. याच ‘एम्स’मध्ये गृहमंत्री अमित शहा हे उपचारांसाठी दाखल झाले व बरे होऊन घरी परतले. ज्या ‘एम्स’वर देशाच्या गृहमंत्र्यांचाच विश्वास आहे, त्या ‘एम्स’ने सुशांतप्रकरणी जो अहवाल दिला, तो अंध भक्त नाकारणार आहेत काय?," असा सवाल विचारत भाजपवरही निशाणा साधण्यात आला आहे. 

''सुशांत राजपूतच्या दुर्दैवी मृत्यूस ११० दिवस झाले. या काळात मुंबई पोलिसांची ज्यांनी यथेच्छ बदनामी केली, मुंबई पोलिसांच्या तपासावर ज्यांनी रोज प्रश्नचिन्ह निर्माण केले, त्या राजकीय पुढाऱ्यांनी, कुत्र्यासारख्या भुंकणाऱ्या गलिच्छ वृत्तवाहिन्यांनी महाराष्ट्राची माफीच मागायला हवी. या सगळय़ांनी महाराष्ट्राच्या प्रतिमेस ठरवून कलंक लावण्याचा प्रयत्न केला. हे एक कटकारस्थानच होते. सबब, या सगळ्यांवर महाराष्ट्र सरकारने अब्रुनुकसानीचा दावाच ठोकला पाहिजे,''अशीही मागणी या अग्रलेखातून करण्यात आली आहे. 

''एखाद्या तरुणाचा अशा प्रकारे मृत्यू होणे हे केव्हाही वाईटच. सुशांत वैफल्य, नैराश्याने ग्रासलेला होता. आयुष्याची उताराला लागलेली गाडी त्याला सावरता येत नव्हती. त्या धडपडीत तो भयंकर अशा अमली पदार्थांच्या नशेच्या आहारी गेला व एक दिवस गळफास घेऊन त्याने जीवन संपवले. सुशांत हा एक चारित्र्यहीन, उडाणटप्पू तरुण कलाकार असल्याचे चित्र सीबीआय तपासानंतर बाहेर पडले. बिहारच्या पोलिसांना तपासात हस्तक्षेप करू दिला असता तर कदाचित सुशांत व त्याच्या कुटुंबाचे रोजच धिंडवडे निघाले असते. बिहार राज्याने व सुशांतच्या कुटुंबाने त्यासाठी मुंबई पोलिसांचे आभारच मानायला हवेत,'' असाही टोला 'सामना'तून लगावण्यात आला आहे. 
Edited By - Amit Golwalkar 

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख