दौंडकरांच्या जिवाला घोर; तीन दिवसांत १५ कोरोनाबाधित मृतदेहांवर अंत्यसंस्कार
दौंड (जि. पुणे) : दौंड शहरातील स्मशानभूमीत मागील तीन दिवसांत पंधरा कोरोनाबाधित मृतदेहांवर अंत्यसंस्कार करण्यात आले आहेत. या पंधरा जणांपैकी चौदा जण हे दौंड शहराबाहेरचे होते. परंतु मृतदेह शहरातून नेण्यात आल्याने दौंडकरांच्या जीवाला काही काळ घोर लागला होता.
दौंड शहर व परिसरात कोरोना विषाणूचा प्रादुर्भाव वाढत आहे. शहरातील उपजिल्हा रूग्णालय, दौंड नगरपालिका व लिंगाळी (ता. दौंड) हद्दीतील रूग्णालयांमध्ये दौंड तालुक्यासह शेजारील शिरूर आणि श्रीगोंदा (जि. नगर) येथील ग्रामस्थ उपचारासाठी दाखल होत आहेत. मागील आठवड्यापासून कोरोना बाधित रुग्णांची संख्या वाढल्यानंतर पंधरा बाधितांचा मृत्यू झाला आहे. हे मृतदेह शहरातील प्रमुख चौकांमधून महात्मा गांधी चौकमार्गे भीमा नदीकाठावरील स्मशानभूमीत रूग्णवाहिकेतून नेण्यात आल्याने दौंडकरांच्या जीवाला घोर लागला होता.
स्मशानभूमीत बिडाच्या पाच शवदाहिन्या आहेत. नगरपालिकेने अंत्यसंस्कारासाठी दत्तात्रेय तुपसौंदर्य व मुकेश तुपसौंदर्य यांची नियुक्ती केली असून ते पर्सनल प्रोटेक्शन इक्विपमेंट (पीपीई) किट परिधान करून अंत्यसंस्कार करतात.
सध्या मध्यरात्री व पहाटे मृतदेह अंत्यसंस्कारासाठी आणले जात आहेत. पंधरा मृतदेहांवर अंत्यसंस्कार झाल्यानंतर काही नातेवाईक सावडण्याचा विधी करण्यास वेळेत न आल्याने जागेअभावी तीन मृतदेहांचे जमिनीवर सरण रचून अंत्यसंस्कार करण्यात आले.
शिकाळी धरण्याचा आग्रह?
रूग्णवाहिकेतून कोरोना बाधितांचा मृतदेह बाहेर काढण्यापासून सरणावर ठेवण्याचे काम करावे लागते. नातेवाईक तेव्हा हातसुध्दा लावत नाहीत. नातेवाईकांनी सांगितले तरच आम्ही अग्निडाग देतो. मात्र अशा परिस्थितीतदेखील काहीजण आम्हाला शिकाळी धरण्याचा आग्रह धरत असल्याने आम्ही त्यास नकार देतो, अशी माहिती मुकेश व दत्तात्रेय तुपसौंदर्य यांनी दिली.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.