अशोक पवारांच्या गावातील जल्लोष प्रदीप कंदांना भोवला 

शिरूर : राष्ट्रवादी कॉंग्रेसचे शिरूर-हवेलीचे आमदार ऍड. अशोक पवार यांचे गाव असलेल्या वडगाव रासाई ग्रामपंचायत निवडणुकीत आमदारांच्या नेतृत्वाखालील पॅनेलचा पराभव झाला होता. सत्ताधारी पक्षाच्या आमदारांच्या पॅनेलचा पराभव हा चर्चेचा विषय झाला होता. त्यानंतर बुधवारी (ता. 24 फेब्रुवारी) वडगाव रासाईत सरपंच आणि उपसरपंचांची निवड होती. 

या दोन्ही पदाच्या निवडणुकीनंतर गावात विजयी मिरवणुकी निघाली होती. त्या गावात जाऊन सरपंचाच्या विजयी मिरवणुकीत बेकायदा जमाव जमवून सहभागी होणे, जल्लोष करणे हे मात्र आमदारांचे पवारांचे कट्टर विरोधक असलेले जिल्हा परिषदेचे माजी अध्यक्ष तथा भारतीय जनता पक्षाचे नेते प्रदीप कंद यांना महागात पडले. जमावबंदीचा आदेश मोडल्याप्रकरणी; तसेच राष्ट्रीय आपत्ती व्यवस्थापन कायदा व साथरोग नियमांचा भंग केल्याप्रकरणी नूतन सरपंचांसह कंद यांच्यावर शिरूर पोलिसांनी आज गुन्हा दाखल केला. 

पोलिस कॉन्स्टेबल योगेश गुंड यांनी दिलेल्या फिर्यादीवरून शिरूर पोलिसांनी जिल्हा परिषदेचे माजी अध्यक्ष प्रदीप कंद, वडगाव रासाई गावचे नवनिर्वाचित सरपंच सचिन शेलार, संपत ऊर्फ नाना संभाजी फराटे यांच्या मालकीच्या जेसीबीवरील चालक, सुरेश गुलाब शेलार यांच्या बेंजोच्या गाडीचा चालक, भाजप सहकार आघाडीचे तालुकाध्यक्ष काका खळदकर, शिवसेनेचे विभाग संघटक वीरेंद्र शेलार, मोहन चव्हाण, भाऊ यादव, पोपट पंढरीनाथ शेलार यांच्याविरूद्ध गुरुवारी (ता. 25 फेब्रुवारी) गुन्हा दाखल करण्यात आला आहे. 

वडगाव रासाई ग्रामपंचायतीच्या सरपंचपदाची बुधवारी (ता. 24) निवडणूक झाली. निवडीनंतर नवनिर्वाचीत सरपंच सचिन शेलार हे ग्रामपंचायतीसमोरील मोकळ्या जागेत आले असता, प्रदीप कंद यांच्यासह आठ ते दहाजण हे जेसीबीच्या बकेटमध्ये बसले व तेथून त्यांनी गुलालाची उधळण केली. या वेळी पन्नास ते साठ जणांनी विनापरवानगी मिरवणूक काढून घोषणाबाजी करीत जल्लोष करण्यात आला, असे पोलिसांनी सांगितले. 

सरपंच-उपसरपंच निवडणुकीनंतर कुठल्याही प्रकारे विनापरवाना मिरवणूक काढू नये, गर्दी जमवू नये, कोरोनाने पुन्हा उचल खाल्ली असल्याने प्रतिबंधात्मक उपाय योजावेत, सोशल डिस्टन्सिंग पाळावे, मास्क लावावेत असे आदेश जिल्हाधिकारी डॉ. राजेश देशमुख यांनी दिलेले असताना आणि जिल्ह्यात जमावबंदीचा आदेश असताना बेकायदा गर्दी जमविल्याप्रकरणी हे गुन्हे दाखल केले असल्याचे या प्रकरणाचा तपास करणारे पोलिस निरीक्षक प्रवीण खानापुरे यांनी सांगितले.