गोळीबार प्रकरण  ः आमदार बनसोडेंचा मुलगा सात दिवसांनंतरही मोकाट; आत्तापर्यंत सात जणांना अटक

या मारहाणीत तो गंभीर जखमी झाल्याने त्याच्यावर रुग्णालयात उपचार सुरू आहेत.
गोळीबार प्रकरण  ः आमदार बनसोडेंचा मुलगा सात दिवसांनंतरही मोकाट; आत्तापर्यंत सात जणांना अटक
firing case : MLA Bansode's son absconding after seven days; Seven people have been arrested

पिंपरी  ः पिंपरीचे (Pimpri) राष्ट्रवादी काँग्रेसचे (Nationalist Congress) आमदार अण्णा बनसोडे (MLA Anna Bansode) यांचा मुलगा सिद्धार्थ बनसोडे (Siddharth Bansode) हा फरार (Absconding) झाला आहे. तो खुनाच्या प्रयत्नांच्या दोन गुन्ह्यांत संशयित आरोपी आहे, असे पिंपरी चिंचवडचे पोलिस आयुक्त कृष्णप्रकाश यांनी आज (ता. १९ मे) ‘सरकारनामा’ला सांगितले. या गुन्ह्यात आमदारांच्या सात कार्यकर्त्यांना अटक केली असल्याची माहितीही त्यांनी दिली. (firing case : MLA Bansode's son absconding after seven days; Seven people have been arrested )

आमदार बनसोडे यांच्या कार्यालयात १२ मे रोजी झालेल्या गोळीबाराच्या घटनेने शहरात मोठी खळबळ उडाली होती. तत्पूर्वी सिद्धार्थ व त्याच्या साथीदारांनी हा गोळीबार करणारा पिंपरी चिंचवड शहरातील कचरा गोळा करणाऱ्या ठेकेदार कंपनीचा व्यवस्थापक तानाजी पवार या माजी सैनिकाचे त्याच्या आकुर्डीतील कंपनीतून अपहरण केले होते. त्याला चिंचवड स्टेशन येथील आमदारांच्या कार्यालयात आणून बेदम मारहाण करण्यात आली होती. या मारहाणीत तो गंभीर जखमी झाल्याने त्याच्यावर रुग्णालयात उपचार सुरू आहेत. 

मारहाणीच्या वेळी स्वतःचा जीव वाचवण्यासाठी पवार याने दोन गोळ्या झाडल्या होत्या. त्यात कोणी जखमी झाले नव्हते. मात्र, आमदारांनी एक गोळी आपल्यावर झाडल्याचे सांगितले होते. तसेच, त्यांच्या कार्यकर्त्याने तशी तक्रार केल्याने पवारविरुद्धही खुनाचा प्रयत्न केल्याचा गुन्हा दाखल करण्यात आलेला आहे. तर, पवारच्या तक्रारीवरून सिद्धार्थसह आमदारांचे कार्यकर्ते यांच्याविरुद्ध अपहरण व खुनाच्या प्रयत्नाचा गुन्हा दाखल करण्यात आलेला आहे. 


दरम्यान, गोळीबाराच्या दिवशी सकाळी सिद्धार्थ बनसोडे व त्याच्या साथीदारांनी पवार याच्या कार्यालयात घुसून धुडगूस घातला होता. तेथील एका अधिकाऱ्यावर जीवघेणा हल्लाही केला होता. त्याबाबत तेथील एका महिला कर्मचाऱ्याच्या तक्रारीवरून आमदारांचे कार्यकर्ते व सिद्धार्थविरुद्ध खुनाच्या प्रयत्नाचा दुसरा गुन्हा दाखल झालेला आहे. त्यात व पवार फिर्यादी असलेल्या गुन्ह्यात आतापर्यंत आमदारांच्या सात कार्यकर्त्यांना पोलिसांनी अटक केली आहे. मात्र, मुख्य आरोपी सिद्धार्थ हा सापडला नसल्याचे निगडीचे वरिष्ठ पोलिस निरीक्षक गणेश जवादवाड यांनी सांगितले. त्यांच्यासह इतर फरार आरोपींचा शोध सुरु असल्याचे त्यांनी सांगितले.

खंडणी मागणारा पत्रकारही फरार

योगायोगाची बाब म्हणजे आमदारांच्या कार्यालयात गोळीबार झालेल्या दिवशीच पिंपरी पोलिस ठाण्यातच दाखल झालेल्या खंडणीच्या गुन्ह्यातील आरोपी पत्रकार सुहास भाकरे हासुद्धा फरार झाला आहे. पिंपरी महापालिकेच्या ऑटोक्लस्टर रुग्णालयाच्या विरोधात बातम्या छापण्याची धमकी देत त्याने हे सेंटर चालविणाऱ्या स्पर्श हॉस्पिटलचे मुख्य कार्यकारी अधिकारी डॉ. अमोल होळकुंदे यांच्याकडून पाच लाख रुपये उकळले होते. हा पत्रकार फरारी झाला असल्याचे पिंपरी पोलिस ठाण्याचे वरिष्ठ पोलिस निरीक्षक मिलिंद वाघमारे यांनी सांगितले.

Related Stories

No stories found.
Sarkarnama
www.sarkarnama.in