नवी मुंबई विमानतळाच्या नावासाठी मनसेची भाजपला साथ 

नवी मुंबई : नवी मुंबईतील प्रस्तावित आंतरराष्ट्रीय विमानतळाच्या नामांतराचा वाद आगामी काळात चिघळण्याची चिन्हे दिसत आहेत. शिवसेनेने या विमानतळाला हिंदुहृदयसम्राट बाळासाहेब ठाकरे यांचं नाव देण्याची मागणी केली आहे, तर भारतीय जनता पक्षाने लोकनेते दि. बा. पाटील यांचं नाव विमानतळाला देण्याची मागणी रेटली आहे. त्यामुळे ठाकरे की पाटील? या मुद्द्यावरून शिवसेना आणि भाजप आमनेसामने उभे ठाकण्याची चिन्हे दिसत आहेत. 

दरम्यान, याबाबत महाराष्ट्र नवनिर्माण सेनेचे नेते गजानन काळे यांनीसुद्धा भाजपच्या सुरात सूर मिसळत दि. बा. पाटील यांचे नाव विमानतळाला द्यावे, अशी मागणी केली आहे. त्यामुळे मनसेनेही या वादात उडी घेतली आहे. 

एकीकडे औरंगाबाद नामांतराचा वाद वाढत असताना दुसरीकडे नवी मुंबईतील नियोजित आंतरराष्ट्रीय विमानतळाच्या नावाचाही वाद उद्‌भवला आहे. त्यात भाजपला मनसेनेकडून साथ मिळण्याची शक्‍यता आहे, त्यामुळे शिवसेना यातून कसा मार्ग काढणार, याकडे राजकीय धुरिणींची लक्ष लागले आहे. 

लोकभावना लक्षात घेता प्रस्तावित नवी मुंबई आंतरराष्ट्रीय विमानतळाला लोकनेते स्व. दि. बा. पाटील यांचेच नाव द्यावे मागणी जोर देऊ धरू लागली आहे. 

स्थानिक प्रकल्पग्रस्त आणि भाजपचे आमदार प्रशांत ठाकूर यांनी नवी मुंबई विमानतळाला दि. बा. पाटील यांचे नाव देण्याची मागणी केली आहे. नवी मुंबईतील कोणत्याही मोठ्या प्रकल्पाला पाटील यांचं नाव देण्यात आलेलं नाही. नवी मुंबईची उभारणी करताना "सिडको'ने सक्तीने जमिनी संपादित केल्या होत्या. भूमिपुत्रांना या जमिनींचा योग्य मोबदला मिळावा; म्हणून दि. बा. पाटील यांनी मोठा लढा उभारला होता. 

या आधीच नगरविकास मंत्री एकनाथ शिंदे यांनी नवी मुंबईतील विमानतळाला बाळासाहेब ठाकरे यांचे नाव देण्याची मागणी केली होती. बाळासाहेबांचं योगदान सर्वश्रुत आहे. त्यामुळे त्यांचा गौरव म्हणून या विमानतळाला त्यांचं नाव देण्यात यावं, अशी मागणी शिंदे यांनी केली होती.