. ..राजकीय दबाव, पैशाचे आमिष दाखवून भाजपचे नगरसेवक फोडले!

जळगाव : राजकीय सत्तेचा दबाव, तसेच पैशाचे आमिष दाखवून भारतीय जनता पक्षाचे (BJP) जळगाव व मुक्ताईनगरचे नगरसेवक फोडण्यात आले, मात्र जनता त्यांना निश्चित धडा शिकवेल असा हल्ला भाजप नेते आमदार गिरीश महाजन (Girish Mahajan) यांनी शिवसेनेवर (Shiv Sena) केला आहे. (BJP leader Girish Mahajan criticized Shiv Sena)

हे ही वाचा : नितीन गडकरी चुकीच्या पक्षात, त्यांचे पंख छाटले जातायेत...

जळगाव महापालिका व मुक्ताई नगरपरिषदेचे नगरसेवक फोडून शिवसेनेत प्रवेश देण्यात येत आहे. त्यामुळे जिल्ह्यातील राजकारणात खळबळ उडाली आहे. भाजपचे नगरसेवक फोडण्याच्या बाबतीत भाजप नेत्यांनी मौन बाळगले होते. मात्र, याबाबतीत गिरीश महाजन यांनी 'सरकारनामा'शी बोलताना स्पष्ट मत व्यक्त केले. महाजन म्हणाले की, शिवसेना राज्यातील सत्तेच्या बळावर दबाव आणत आहे, तसेच नगरसेवकांना पैशाचे आमिष दाखवून त्यांचे पक्षांतर करून घेत आहेत. 

भारतीय जनता पक्षात असल्यामुळे जनतेने या नगरसेवकांना निवडून दिले. आता मात्र ते पक्ष सोडून गेले आहेत, जनता आजही आमच्या सोबत असून आगामी काळात त्यांना त्यांची जागा दाखवून देईल. मुक्ताईनगर येथील नगरसेवक फुटले असल्याने त्यांना शिवसेनेने सत्तेच्या बळावर अपात्रतेची भीती दाखवली, तसेच काही नगरसेवकांना पैशाचे आमिष दाखवले, असा आरोपही महाजन यांनी केला.

हे ही वाचा : मोठी बातमी : मुंबई, पुणे, नाशिक, नागपूरसह दहा शहरांत दुकानांच्या वेळा वाढणार

 नगरसेवक अपात्र होतीलच

भारतीय जनता पक्ष सोडून गेलेले सर्व नगरसेवक पक्षांतर बंदी कायद्यानुसार अपात्र ठरतील असा विश्वास महाजन यांनी व्यक्त केला, ते म्हणाले, भाजपने त्यांच्या विरोधात तक्रार दाखल केली आहे, लवकरच त्याना नोटीस बजावली जाईल.

पक्ष मजबूत आहे

नगरसेवक फुटिमुळे जिल्ह्यात भाजप कमकुवत होत असल्याचे अमान्य करून महाजन म्हणाले, पक्षाला काहीही फरक पडला नाही पक्ष मजबूत आहे. आगामी जिल्हा परिषद, पंचायत समिती निवडणुकीत भाजप निश्चित आपली ताकत दाखवून देईल.