नगर : केंद्र सरकार सीरम इन्स्टिट्यूटला धमकी देत असल्यामुळेच महाराष्ट्राला लसीचे दीड कोटी डोस उपलब्ध करून दिल्या नाहीत. खासगी कंपन्याही राज्याला लस विक्रीसाठी व्यवहार करण्यास तयार नाहीत, असा आरोप राज्याचे ग्रामविकास मंत्री व नगरचे पालकमंत्री हसन मुश्रीफ (Hasan Mushrif) यांनी रविवारी नगरमध्ये केला. (Rural Development Minister Hasan Mushrif criticizes the central government)
मुश्रीफ म्हणाले की ''त्यामुळे लसीकरणाची जबाबदारी राज्यावर न टाकता केंद्र सरकारनेच स्वीकारावी व लसीकरण करून महाराष्ट्राला भयमुक्त करावे, असे आवाहन देखील त्यांनी केंद्र सरकारला केले.
दरम्यान, रविवारी जालन्यामध्ये बोलताना राज्याचे आरोग्यमंत्री राजेश टोपे यांनी सांगितले होते की ''लसींची उपलब्धता नसल्याने 18 ते 44 वयोगटातील नागरीकांना राज्यात लसीकरण बंद आहे. राज्यातील लसीकरणाला वेग मिळावा, कोरोनाचा संसर्ग रोखण्यासाठी सर्व वयोगटातील नागरिकांना लस मिळावी, असे सरकारचे प्रयत्न होते. त्यासाठी जागतिक निविदा देखील काढण्यात आल्या. मात्र, त्यामध्ये अनेक अडचणी आहेत, त्यामुळे विदेशातून लस मिळणे शक्यता कमी असल्याचे टोपे यांनी सांगितले होते.
देशातील कोरोना (Covid-19) संसर्ग रोखण्यासाठी सरकारने कोरोना लसीकरणावर (Covid Vaccination) भर दिला आहे. लशीची टंचाई निर्माण झाल्याने या मोहिमेला ब्रेक लागला आहे. असे असतानाही जगात कोरोना लसीकरणात भारताचा (India) तिसरा क्रमांक असल्याचा दावा केंद्रीय गृह राज्यमंत्री जी.किशन रेड्डी यांनी केला आहे.
देशात आतापर्यंत 21 कोटी 85 लाख नागरिकांना कोरोना लस देण्यात आली आहे, असे सांगून रेड्डी म्हणाले की, जगातील इतर देशांच्या तुलनेत भारतातील लसीकरण मोहीम व्यापक आहे. एवढ्या मोठ्या प्रमाणात नागरिकांना लस देणारा भारत हा जगातील तिसऱ्या क्रमांकाचा देश ठरला आहे. सर्व राज्ये आणि केंद्रशासित प्रदेशांमध्ये लसीकरण मोहिमेला गती मिळाली आहे. डिसेंबर अखेरपर्यंत सर्वांना लस देण्याचे उद्दिष्ट्य सरकारने ठरवले आहे.
सरकारने 250 कोटी डोसचे उत्पादन करण्यासाठी कृती आराखडा आखला आहे. याचबरोबर सरकार लस आयात करत आहे. देशात लशीची सर्वाधिक आयात 1 जूनला झाली. काल देशाला 56.6 टन रशियाच्या स्पुटनिक व्ही लस मिळाली. फायजर आणि जॉन्सन अँड जॉन्सनकडून लस मिळवण्याबाबतही चर्चा सुरू आहे. पुढील सात ते आठ महिन्यांत सर्वांचेच लसीकरण झालेले असेल, असे रेड्डी यांनी सांगितले होते.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.