एकनाथ खडसे यांच्यावर भाजपमध्ये मोठा अन्याय : जयंत पाटील 

पुणे : " भाजपचे ज्येष्ठ नेते एकनाथ खडसे यांनी पक्ष सोडल्याची माहीती मला मिळाली आहे. खडसे यांच्या पाठोपाठ हळूहळू आणखीही नेते पक्षात येतील. आताच नाव उघड करणार नाही अशी माहीती राष्ट्रवादी कॉंग्रेसचे प्रदेशाध्यक्ष आणि राज्याचे अर्थमंत्री जयंत पाटील यांनी आज दिली. 

काहीवेळापूर्वीच खडसे यांनी सामला सांगितले होते, की मी सकाळी मुंबईच्या दिशेने निघणार आहे. राष्ट्रवादी पक्ष प्रवेशाचा मुहूर्त राष्ट्रवादीचे प्रदेश अध्यक्ष जयंत पाटील हे ठरवतील अशी माहीती भाजपचे ज्येष्ठ नाराज नेते एकनाथ खडसे यांनी दिली होती. त्यानंतर काही वेळात पत्रकार परिषद घेऊन पाटील यांनी खडसे यांच्या पक्षप्रवेशाची माहीती दिली. 

पाटील म्हणाले, की आम्ही पक्षात खडसेसाहेबांचे स्वागत करीत आहोत. त्यांनी गेल्या तीन दशकापासून भाजपमध्ये काम केले आहे. दिवंगत नेते गोपीनाथ मुंडे यांच्या खांद्याला खांद्या लावून त्यांनी पक्ष वाढविला आहे. ते एक अभ्यासू नेते आहेत. पक्षात येत आहेत याचा निश्‍तितच आनंद आहे. त्यांच्यावर पक्ष कोणती जबाबदारी देणार असे विचारले असता ते म्हणाले, की आज प्रवेश आहे. कोणती जबाबदारी द्यायची याचा निर्णय लवकरच होईल. भाजपने त्यांच्यावर मोठा अन्याय केला आहे. शुक्रवारी दुपारी दोन वाजता त्यांचा पक्षप्रवेश होणार आहे. 

खडसे यांच्यासारखा नेता पक्ष सोडून का जात आहे याचे आत्मपरिक्षण भाजपने करावे असेही पाटील यांनी यावेळी सांगितले 

गेल्या काही दिवसापासून खडसे हे भाजपला सोडचिठ्ठी देणार असल्याची जोरदार चर्चा राजकीय वर्तुळात सुरू होते. ते राष्ट्रवादीमध्ये प्रवेश करणार असल्याची माहिती पुढे येत होती. खडसे यांनी राष्ट्रवादीच्या नेत्यांच्या भेटीगाठी घेतल्याचेही बोलले जात होते. 

कालही "साम'ने दिलेल्या बातमीत खडसे हे उद्या म्हणजे गुरूवारी राष्ट्रवादीत प्रवेश करणार असल्याचे वृत्त दिले होते. मात्र खडसे यांनी आपण अद्याप भाजपमध्येच आहोत. अजूनही राजीनामा दिला नसल्याचे सांगितले होते. तर दुसरीकडे भाजपचे प्रदेशाध्यक्ष चंद्रकांत पाटील यांनी नाथाभाऊ भाजप सोडून कोठेही जाणार नाहीत असे सांगत होते. तसे मात्र होताना दिसत नाही. नाथाभाऊंनी भाजपला अखेर रामराम केला आहे.